Kínverski seðlabankinn hefur lækkað stýrivexti í annað sinn á tveimur mánuðum. Lánavextir verða 6% í stað 6,31% áður og innlánsvextir lækka úr 3,25% í 3%. Fyrir fyrri lækkunina sem bankinn gerði í júní hafði bankinn ekki lækkað stýrivexti síðan árið 2008. Með aðgerðunum vill seðlabankinn bregðast við samdrætti í efnahag landsins. Viðskiptavefur BBC greinir frá ákvörðun bankans í dag.
Evrópski Seðlabankinn og sá danski tilkynntu einnig í dag um lækkun á stýrivöxtum. Í Evrópu nam lækkunin 0,25 prósentum. Stýrivextir á svæðinu eru nú 0,75% og hafa aldrei verið lægri.
Seðlabanki Danmerkur lækkaði einnig vexti. Eins og greint var frá á vef Viðskiptablaðsins fyrr í dag eru innlánsvextir nú í fyrsta sinn komnir niður fyrir núll. Ástæða fyrir lækkun þar í landi er sögð sú að bankinn vill hægja á fjármagnsflæði til landsins. Í ljósi erfiðleika í Suður Evrópu þá hefur Danmörk þótt nokkuð öruggur staður til að geyma fjármuni á.
