Víglundur Þorsteinsson, fyrrum stjórnarformaður B.M.Vallár, sakar stjórnvöld um að hafa brotið lög með því að fara ekki eftir reglum neyðarlaganna. Líklegt sé að ráðherrar í ríkisstjórn Jóhönnu Sigurðardóttur og Steingríms J. Sigfússonar, einstakir starfsmenn nýju bankanna og skilanefnda hafi gerst brotlegir við ýmis ákvæði laga.
Þetta segir í yfirlýsingu sem Víglundur las í byrjun blaðamannafundar sem nú stendur yfir. Hann telur ljóst að skuldunautum Arion banka hafi verið mismunað í uppgjöri við bankann eftir efnahagshrunið.
Víglundur afhenti blaðamönnum möppu með gögnum um málið en hann vísar meðal annars í skýrslu fjármálaráðherra um endurreisn viðskiptabankanna frá mars 2011. Hann segir að í henni sé lýst atburðarás sem stangist á við reglur neyðarlaganna.
Í yfirlýsingunni segir að Fjármálaeftirlitið og Úrskurðanefnd um upplýsingamál hafi neitað Víglundi um afhendingu samninga um endurmat á lánasöfnum sem færð voru úr Kaupþingi yfir í Arion banka.
„Úrskurðurinn staðfesti hins vegar að í Arion banka var gerður listi yfir skuldara sem vinna skyldi á til ávinnings fyrir skilanefndina. Sú vinna fór fram að frumkvæði og undir verkstjórn ríkisstjórnar Jóhönnu og Steingríms. Þá staðfesti úrskurðurinn að á listanum var meðal annarra að finna nafn fyrirtækis míns B.M. Vallár Hf.,“ segir Víglundur.
