*

laugardagur, 25. nóvember 2017
Innlent 16. október 2017 10:10

Sjálfstæðisflokkur aftur stærstur

Tilkoma Miðflokks Sigmundar Davíðs Gunnlaugssonar hefur dregið úr fylgi bæði Framsóknar og Flokk fólksins.

Ritstjórn
Haraldur Jónasson

Nokkrar breytingar hafa orðið á fylgi flokka frá því seinni partinn í september. Miðflokkurinn kemur sterkur inn og fylgi Samfylkingarinnar og Viðreisnar eykst meðan Vinstri grænir dala nokkuð á ný og eru þeir aftur komnir niður fyrir Sjálfstæðisflokkinn.

Á sama tíma hefur fylgi við Framsóknarflokkinn, Flokk fólksins og Bjarta framtíð minnkað að því er segir þjóðarpúlsi Gallup, sem byggir á mælingum dagana 29. september til 12. október.

Slitaflokkarnir ólíklega inn á þing

Hvorugur ríkisstjórnarflokkanna sem slitu samstarfinu við Sjálfstæðisflokkinn virðast þó vera á leið inn á þing, enda bæði Björt framtíð og Viðreisn með undir 5% fylgi.

Síðan um aldamótin hefur það verið lágmarkið til þess að fá jöfnunarsæti en fyrir það þurftu flokkar að hafa kjördæmakjörinn mann, til þess, sem þýddi í flestum tilvikum nokkuð hærra hlutfall.

Miðflokkurinn stærri en Framsókn og Flokkur fólksins

Rösklega 9% segjast myndu kjósa Miðflokkinn færu kosningar til Alþingis fram nú, en framboðið kom fram undir lok síðasta könnunartímabils. Ríflega 13% myndu kjósa Samfylkinguna sem er aukning um fjögur prósentustig og nær 5% myndu kjósa Viðreisn. Fylgi Flokks fólksins minnkar um ríflega 4 prósentustig frá því í síðustu mælingu og Framsóknarflokksins um næstum 3 prósentustig.

Rúmlega 7% segjast myndu kjósa Framsóknarflokkinn nú og nær 6% Flokk fólksins. Fylgi Bjartrar framtíðar er einnig lægra nú en seinni hluta september, en 3% segjast myndu kjósa flokkinn. Ekki er marktæk breyting á fylgi annarra framboða.

Dögun, Alþýðufylkingin og Þjóðfylkingin langt frá lágmarki

Nær 24% segjast myndu kjósa Sjálfstæðisflokkinn, 23% Vinstri græn, tæplega 9% Pírata, 0,5% Dögun, 0,2% Alþýðufylkinguna og 0,1% Íslensku þjóðfylkinguna. Slétt 13% taka ekki afstöðu eða neita að gefa hana upp og nær 7% svarenda segjast myndu skila auðu eða ekki kjósa ef kosið yrði til Alþingis í dag.

Ef skoðuð er fylgisbreytingin frá síðustu könnun sem var tekin dagana 15. til 28. september sést að fylgið skiptist þannig:

  • Sjálfstæðisflokkurinn fer úr um 23% í 23,7%
  • Vinstri græn fara úr um 25% niður í 23,0%
  • Samfylkingin hefur stokkið úr um 9% í 13%
  • Miðflokkurinn hefur farið úr um 5% í 9,5%
  • Píratar hafa farið úr um 10% niður í 8,8%
  • Framsóknarflokkurinn hefur minnkað úr um 10% niður í 7,2%
  • Flokkur fólksins hefur farið úr um 10% niður í 5,7%
  • Viðreisn hefur farið úr um 4% í 4,8%
  • Björt framtíð hefur farið úr um 5% í 3,0%.