FAST 1, samlagshlutafélag í eigu lífeyrissjóða og tryggingafélaga í rekstri VÍB og Contra, hefur keypt eignarhaldsfélagið HTO ehf, sem á Höfðatorg við Borgartún og Katrínartún í Reykjavík. Íslandsbanki átti félagið áður. Ekkert er gefið upp um kaupverðið í tilkynningu frá Íslandsbanka. Þar segir hins vegar að Íslandsbanki hafi gengið að kauptilboðinu og hafi FAST-1 hafið undirbúning að uppgjöri kaupanna. Stefnt er á að þeim ljúki á næstu vikum.
Höfðatorg er tvískipt bygging, annars vegar er um að ræða 19 hæða turn með tveggja hæða bílakjalla auk skrifstofa framkvæmdasviðs Reykjavíkurborgar á sjö hæðum í öðru húsi.
Höfðatorg var um síðustu áramót metið á 13,7 milljarða króna, samkvæmt bókfærðu verði HTO. Byggingarisinn Eykt reisti húsið á sínum tíma. Íslandsbanki fjármagnaði framkvæmdirnar á sínum tíma en tók Höfðatorg yfir að mestu í desember árið 2011. Bankinn var skrifaður fyrir 72% eignarhlut í félaginu samkvæmt síðasta ársreikningi.
Íslandsbanki auglýsti svo HTO ehf til sölu í júní síðastliðnum. Frestur til að skila inn tilboðum rann út í byrjun júlí.
