*

fimmtudagur, 21. febrúar 2019
Innlent 18. janúar 2019 14:27

Skipulagsbreytingar hjá Eimskip

Eimskip skiptir um millistjórnendur samhliða ráðningu nýs forstjóra sem verður á lægri launum en forveri hans.

Ritstjórn
Vilhelm Már Þorsteinsson, nýráðinn forstjóri Eimskips.
Aðsend mynd

Eimskip hefur gert breytingar á rekstrinum þar sem tíu stöðugildi, flest hjá millistjórnendum félagsins verða ýmist lögð niður eða taka breytingum samkvæmt tilkynningu frá Eimskip.

Í tilkynningunni segir að á undanförnum misserum hafa átt sér stað breytingar í rekstrarumhverfi Eimskips sem kalli á aukna hagræðingu og skilvirkni í rekstri. Þá segir jafnframt að laun nýs forstjóra, Vilhelms Más Þorsteinssonar, muni taka mið af því markmiði að lækka kostnað félagsins. Laun Gylfa Sigfússonar, fráfarandi forstjóra hafa verið með þeim hæstu meðal forstjóra skráðra félaga í Kauphöll Íslands. Mánaðarlaun Gylfa árið 2017 námu um 8,5 milljónum króna.

 „Tilgangurinn með þessum breytingum er að hagræða í rekstri félagsins og geta betur mætt kröfum viðskiptavina okkar um hagkvæma og framúrskarandi þjónustu. Áhersla stjórnar og stjórnenda er að draga úr rekstrarkostnaði eins og kostur er og er þessum breytingum ætlað að styðja við þau markmið þar sem stjórnskipulag er einfaldað. Með nýju rekstrarsviði næst betri yfirsýn yfir mikilvægustu kostnaðarþætti félagsins,“ er haft eftir Baldvini Þorsteinssyni, stjórnarformanni Eimskips í tilkynningu. 

Helstu breytingar eru þær að Hilmar Pétur Valgarðsson fjármálastjóri Eimskips mun taka við nýju sviði, Rekstrarsviði, sem sameinar helstu rekstrareiningar félagsins tengdum skiparekstri og siglingakerfi. Egill Örn Petersen forstöðumaður á fjárhagssviði mun taka við starfi fjármálastjóra og leiða fjármálasvið félagsins. Ný deild, Ferla- og upplýsingatæknideild, sem áður voru tvær aðskildar deildir í skipuriti mun heyra beint undir forstjóra. 

Samhliða þessum skipulagsbreytingum verður hagrætt í siglingakerfi félagsins. Strandsiglingar verða nú aðra hverja viku í stað vikulega frá Íslandi, eins og áður hefur verið tilkynnt, auk þess sem fækkað hefur verið um eitt skip í siglingakerfi félagsins í Noregi. Aukið verður við þjónustu við ferskfisk- og uppsjávarviðskiptavini í Færeyjum með vikulegum siglingum frysti- og gámaskipsins Svartfoss milli Færeyja og Bretlands auk þess sem aðra hverja viku verða siglingar milli Færeyja og Hollands.

Eftirfarandi breytingar verða gerðar hjá Eimskip samkvæmt tilkynningunni:

Rekstrarsvið er nýtt svið sem Hilmar Pétur Valgarðsson, núverandi framkvæmdastjóri fjármála- og rekstrarsviðs, mun stýra. Ábyrgð sviðsins nær yfir rekstrareiningar sem hafa til þessa verið undir fjármála- og rekstrarsviði annars vegar og flutningasviði hins vegar. Með þessari breytingu er allur rekstrarkostnaður skipa og flutningakerfa sameinaður á einu sviði með það að markmiði að ná fram aukinni hagkvæmni í rekstri. 

Undir sviðið munu heyra skiparekstur, siglingakerfi, gámastýring, innkaupa- og kostnaðareftirlit, tjóna og tryggingarmál ásamt öryggis- og forvarnarmálum.

Fjármálasvið sem áður hét fjármála- og rekstrarsvið ber ábyrgð á fjármálum Eimskips samstæðunnar á alþjóðavísu. Egill Örn Petersen sem starfað hefur sem forstöðumaður fjárhagsdeildar tekur við starfi framkvæmdastjóra fjármálasviðs. 

Egill hóf störf hjá Eimskip árið 2003, fyrst sem sérfræðingur í hagdeild og síðar sem deildarstjóri sömu deildar. Hann tók við starfi forstöðumanns fjárhagsdeildar árið 2009. Egill lauk B.Sc. gráðu í viðskiptafræði árið 2002 frá Háskóla Íslands. 

Sölu- og markaðssvið sem áður hét flutningasvið, sem Matthías Matthíasson stýrir, mun sem áður leggja áherslu á sölu og framúrskarandi þjónustu til viðskiptavina í áætlunarkerfi félagsins. Að auki mun markaðsdeild Eimskips færast undir sviðið. 

Innanlandssvið sem Guðmundur Nikulásson stýrir, mun sem áður bera ábyrgð á rekstri landflutninga, vöruhúsa og hafnarþjónustu félagsins á Íslandi. 

Alþjóðasvið sem Bragi Þór Marinósson stýrir, mun sem áður bera ábyrgð á rekstri félagsins erlendis að undanskildum skiparekstri.

Mannauðssvið sem áður hét mannauðs- og markaðssvið, sem Elín Hjálmsdóttir stýrir, ber ábyrgð á stefnum, framkvæmd og samræmingu í mannauðsmálum og samfélagslegri ábyrgð hjá Eimskip á alþjóðavísu. Elín Hjálmsdóttir framkvæmdastjóri sviðsins mun jafnframt taka að sér hlutverk upplýsingafulltrúa félagsins. 

Ferla- og upplýsingatæknideild  sem áður voru tvær aðskildar deildir í skipuriti verður stýrt af Hilmari Karlssyni forstöðumanni en deildin heyrir nú beint undir forstjóra.