Knattspyrnusamband Íslands (KSÍ) hefur ráðið þýska fyrirtækið Lagardére til að gera hagkvæmnisáætlun fyrir framtíð Laugardalsvallar. Þetta kemur fram í frétt Morgunblaðsins í dag . Áætlað er að skýrslan á að verða tilbúin í ágúst en engin kostnaðaráætlun er komin eða tímasetning á nýjum velli. Þessi fyrstu skref hafa það aðeins að markmiði að kanna hvort rekstrargrundvöllur sé fyrir nýjum velli.
Á blaðamannafundi KSÍ í gær ítrekaði Geir Þorsteinsson, formaður KSÍ, þann vilja sinn að hlaupabrautir Laugardalsvallar fari. Hann sagði einnig að þetta skref væri stórt fyrir KSÍ en á endanum væri það Reykjavíkurborg sem ráði hver framtíð vallarins er enda á borgin Laugardalsvöll. Komið hefur fram að KSÍ vilji kaupa Laugardalsvöllinn af borginni.
„Við viljum leikvang sem mætir nútímakröfum í knattspyrnu en líka gæti hann tekið að sér ýmsa aðra viðburði og yrði svokallaður fjölnota leikvangur. Skýrsla Borgarbrags sýndi að það var skynsamlegt að halda áfram með þetta verkefni og það ætlum við að gera. Það er þó ljóst að á þessu sviði höfum við ekki þekkingu á Íslandi til að gera þetta og þess vegna leituðum við til Lagardére,“ sagði Geir.