*

mánudagur, 19. nóvember 2018
Innlent 12. september 2018 09:38

Skúli á fundi með bankastjórum

Bankastjórar stóru bankanna funduðu með stjórnendum WOW air í turninum við Höfðatorg.

Ritstjórn
Haraldur Guðjónsson

Stjórnendur WOW ásamt fulltrúum Arctica Finance funduðu með bankastjórum stóru bankanna þriggja í gær. Fundað var í húsakynnum Arctica Finance í turninum við Höfðatorg.  Þetta kemur fram í Fréttablaðinu.

Fréttablaðið greinir frá því að Arion banki, Íslandsbanki og Landsbankinn skoði nú hugsanlega aðkomu að skuldabréfaútboði WOW. Eins og áður hefur komið fram er WOW að reyna að afla 5,5 milljarða króna í útboðinu en samkvæmt Fréttablaðinu vantar enn „milljarða" upp á að lágmarki skuldabréfaútboðsins verði náð.

Í ágúst fundaði Skúli Mogensen einnig með bönkunum eins og kom fram í frétt Viðskiptablaðsins, sem birtist undir fyrirsögninni „Biðlar til íslenskra fjárfesta".

Þegar skuldabréfaútboðið var kynnt um miðjan ágúst hugðist WOW air sækja sér 6 til 12 milljarða króna. Átti það að duga til að brúa reksturinn næstu átján mánuði en þá stefnir félagið að skráningu á markað. Síðan þá hefur ýmislegt breyst, bæði skilmálar í útboðinu sem og fjárhæðin sjálf því nú hyggst félagið sækja sér 5,5 milljarða eins og áður sagði.
Fréttablaðið hefur eftir jafnframt eftir heimildum að Skúli Mogensen, eigandi WOW, og Páll Rúnar Mikael Kristinsson, lögmaður félagsins, hafi setið fund í húsakynnum Samkeppniseftirlitsins seinnipartinn í gær en hefur engar upplýsingar um þann fund.

Stikkorð: Skúli Mogensen Wow air Wow