*

föstudagur, 24. maí 2019
Innlent 15. maí 2019 15:24

Stal humri og ávanabindandi lyfjum

Karlmaður var dæmur í fimm mánaða fangelsi fyrir að stela 434 kg. af humri og lyfjum að verðmæti 317 þúsund.

Ritstjórn
Mennirnir klipptu á keðju sem lokaði gámnum og voru mjög röskir að rífa kassana út.

Karlmaður á þrítugsaldri var í Héraðsdómi Reykjaness fyrir viku dæmdur í fimm mánaða óskilorðsbundið fangelsi fyrir þjófnaðar- og fíkniefnalagabrot. Maðurinn braust meðal annars, í félagi við annan mann, inn í frystigám Humarsölunnar ehf. og hafði þaðan á brott 434 kg. af humri.

Nokkuð var fjallað um þjófnaðinn á humrinum þegar sagt var frá málinu í fyrra. Mennirnir tveir tóku aðeins humar með sér en létu hnossgæti á borð við þorskhnakka, risarækju og hörpudisk vera. Verðmæti humarsins var áætlað 1,7 milljónir króna en 63 kg. af honum fundust við húsleit á heimili hans. 

„Ég skal gefa þeim það að þeir voru djöfull snöggir miðað við myndbandið. Það kom mér á óvart og það væri vel hægt að nota þá einhvers staðar ef þeir myndu nenna því,“ sagði Guðjón Sigurðsson, hjá Humarsölunni, í samtali við Fréttablaðið á þeim tíma. 

Hinn maðurinn hlaut þrjátíu daga fangelsi, skilorðsbundið til tveggja ára, fyrir sinn þátt í humarþjófnaðinum. Þyngri refsing hins mannsins helgast af því að hann var einnig sakfelldur fyrir að hafa brotist inn í Apótek Suðurnesja í október í fyrra og stolið þaðan lyfjum að verðmæti rúmlega 317 þúsund króna. Meðal þess sem hann hafði á brott voru kassar af alprazolam, concerta, rítalín, oxycontin og contalgin.

Þá var hann að auki sakfelldur fyrir vörslu á kannabis og þjófnað úr ÁTVR. Humarþjófnaðurinn átti sér stað í febrúar í fyrra en á vormánuðum síðasta árs hlaut hann annan dóm, meðal annars fyrir þjófnað. Við ákvörðun refsingar var litið til þess og að humarþjófnaðinn framdi hann í sameiningu við annan mann. Aftur á móti var það metið til mildunar að hann játaði brot sín skýlaust og hið sama gerði góð hegðun hans í fangelsi undanfarið en hann afplánar nú dóm sinn frá í fyrra. Mennirnir voru dæmdir til að greiða þóknun verjanda síns en ekki var höfð uppi einkaréttarkrafa, hvorki vegna humarsins né lyfjanna.

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim