Fyrsta Starbucks kaffihúsið sunnan Sahara í Afríku mun opna á næsta ári eftir að keðjan gerði samkomulag við suður-afrískan umboðsaðila.
Fyrsti Starbucks staðurinn mun opna í Jóhannesarborg árið 2016 og munu fleiri staðir fylgja í kjölfarið. Starbucks rekur yfir 22.000 kaffihús víðs vegar um heiminn og mun staðurinn þurfa að berjast við innlenda samkeppni í Suður-Afríku.
Alþjóðleg fyrirtæki eru farin að sækja til Afríku í meiri mæli og nýta sér þar sívaxandi millistéttina í heimsálfunni.
„Kaffimarkaðurinn hérna er kvikur og vex hratt, við viljum vera hluti af þessum vexti,“ sagði Kris Engskov, framkvæmdastjóri Starbucks, í yfirlýsingu.
Meðal fyrirtækja sem hafa rutt sér til rúms í Suður Afríku eru verslunarkeðjan Walmart. Þá ætlar kleinuhringjakeðjan Krispy Kreme að opna 31 stað í Suður Afríku á næstu fimm árum.
