Stefán Karl Stefánsson, leikari, er látinn. Stefán var 43 ára gamall og lætur eftir sig eiginkonu og fjögur börn, en hann hafði barist við krabbamein í tvö ár. Þetta kemur fram í ítarlegri umfjöllun Vísis um Stefán .
Farið er yfir ævi og störf Stefáns, en hann var líklega þekktastur í seinni tíð fyrir að leika hlutverk Glanna Glæps í leikritinu Latibær, sem seinna var gert að bandarískum sjónvarpsþætti og gerði Stefán þannig heimsfrægan.
Ekkja Stefáns, Steinunn Ólína Þorsteinsdóttir, segir að í stað jarðarfarar verði jarðneskum leifum hans dreift í kyrrþey. Hún og fjölskyldan vill koma á framfæri þökkum fyrir sýndan stuðning og hlýhug, og sendir vinum og aðdáendum Stefáns innilegar samúðarkveðjur.
