Bjarni Benediktsson fjármálaráðherra sagði í viðtali við Sigurjón M. Egilsson í útvarpsþættinum Sprengisandi á Bylgjunni í morgun að til standi að lækka tryggingargjaldið um 0,14% um áramótin en að það væri ekki svigrúm til frekari lækkana strax.
„En það sem er að gerast hér á árinu 2015 er að við erum að taka út meiri launahækkanir heldur en við stöndum undir. Þetta er bara svona. Það veldur því að það er ekki svigrúm í ríkisfjármálum til þess að mæta öllum væntingum,“ sagði Bjarni.
Líkt og greint hefur verið frá í Viðskiptablaðinu er SALEK-samkomulagið í ákveðnu uppnámi vegna þess að engar áætlanir eru um að lækka tryggingagjald af einhverju ráði. Bjarni sagði það ekki standa í SALEK-samkomulaginu að tryggingagjald eigi að lækka stórlega um áramótin. Hins vegar standi til að gera það.
„Við viljum fyrst og fremst hækka laun. Það sem hefur komið fram í þessari kjaralotu eru hækkanir sem eru umfram það sem við raunverulega stöndum undir,“ segir Bjarni.