*

föstudagur, 26. apríl 2019
Innlent 13. september 2018 18:55

Stjórn Granda samþykkir kaupin á Ögurvík

Kaup HB Granda á Ögurvík, sem er í eigu stærsta hluthafa HB Granda, fyrir 12 milljarða byggja á mati tveggja óháðra matsmanna.

Ritstjórn
Guðmundur Kristjánsson, forstjóri HB Granda og stór hluthafi í Brimi.
Haraldur Guðjónsson

Stjórn HB Granda hefur samþykkt kaup félagsins á öllu hlutafé í útgerðarfélaginu Ögurvík fyrir 12,3 milljarða króna samkvæmt tilkynningu frá félaginu.

Ögurvík er í eigu Brims, sem er stærsti hluthafi HB Granda með ríflega þriðjungshlut. Í tilkynningunni kemur fram að kaupverðið byggi á niðurstöðum tveggja óháðra matsmanna. Þá vinni Deloitte á Íslandi skýrslu um kaupin samkvæmt lögum um viðskipti tengdra aðila sem kynnt verði hluthöfum en leggja á kaupin fyrir hluthafafund til samþykktar. Viðskiptin eru einnig háð samþykki Samkeppniseftirlitsins. Fjármagna á kaupin með eigin fé og lánsfjármagni. 

Í tilkynningu stjórnar kemur jafnframt fram að með kaupunum á Ögurvík breikki grunnur allrar starfsemi HB Granda. „Fiskveiðikvóti félagsins eykst, einkum í verðmætum tegundum eins og þorski en botnfiskkvótinn fer úr 48 þúsund tonnum í 56 þúsund tonn. Tækifæri skapast á aukinni sérhæfingu í veiðum og í landvinnslu. Vinnsla á verðmætari afurðum í landi mun aukast. Þá verður nýting á hráefni og vinnsla á öðrum afurðum hagfelldari og staða félagsins á mörkuðum styrkist með aukinni framleiðslu ekki hvað síst í Asíu þar sem eftirspurn eykst stöðugt. Verð á afurðum félagsins getur því hækkað og arðsemin af aflaheimildum og fjárfestingum í vinnslu eykst af sama skapi. Kaupin á Ögurvík eru í samræmi við áherslur félagins á veiðar og vinnslu tegunda með hærri framlegð og að sækja á arðbæra og vaxandi markaði,“ segir í tilkynningunni.

Ögurvík ehf. er útgerðarfélag sem gerir út Vigra RE 71 sem er 2.157 tonna frystitogari smíðaður árið 1992. Aflaheimildir félagsins á fiskveiðiárinu sem hófst 1. september 2018 eru 7.680 tonn af botnfiski og 1.663 tonn af makríl miðað við úthlutun árið 2018. Ögurvík hefur rekið útgerð frá Reykjavík í meira en hálfa öld, en Vigri RE er eitt kvótahæsta fiskiskip íslenska flotans. Rekstrartekjur félagsins á árinu 2017 voru 2.197 milljónir króna , 2.160 milljónir kr. árið 2016 og 2.193 milljónir kr. árið 2015. EBITDA félagsins var 348 milljónir króna árið 2017, 366 milljónir kr. árið 2016 og 707 milljónir kr. árið 2015.

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim