Suður-Kóreska fyrirtækið Pearl Abyss hyggst kaupa allt hlutafé í íslenska tölvuleikjaframleiðandanum CCP fyrir um 425 milljónir bandaríkjadala eða sem jafngildir 46 milljörðum íslenskra króna. Þetta kemur fram í Morgunblaðinu í dag.
Starfsemi CCP hérlendis verður óbreytt þrátt fyrir söluna en um 200 manns starfa fyrir fyrirtækið á Íslandi og um það bil 50 manns á Bretlandi og Shanghai.
Birgir Már Ragnarsson, stjórnarformaður CCP segir í samtali við Morgunblaðið að Novator Partners hafi orðið stærsti hluthafi CCP árið 2005 og hafi verið leiðandi fjárfestir í fyrirtækinu í rúmlega 13 ár.
„Á þeim tíma hefur fyrirtækið vaxið úr litlu tölvuleikjafyrirtæki í að reka starfsstöðvar víða um heim með hundruðum starfsmanna. Hilmar Veigar Pétursson og allt hans skapandi og einarða teymi hefur byggt upp félag sem Novator lætur nú stolt í hendur Pearl Abyss. Saman verða þessi félög firnasterk og munu vera í góðri stöðu til að halda áfram að vaxa," segir Birgir.
Þá segir hann jafnframt að þó svo að EVE Online hafi aldrei verið formlega settur á markað í Kóreu og þýddur yfir á þeirra tungumál þá séu nokkuð margir þar í landi sem spila ensku útgáfu leiksins. Fyrirtækið er með það í skoðun hvort leikurinn verði settur á markað í Kóreu.