Swatch, svissneski úraframleiðandinn, tilkynnti í dag um samstarf við greiðslukortafyrirtækið Visa.

Samstarfið mun miða að því að hanna og framleiða sérstaka línu armbandsúra. Úrin verða búin búnaði sem gerir notanda úrsins kleift að greiða gegnum Visa-reikning sinn með úrinu, og getur þá einfaldlega snert úrið við posa sem útbúnir eru þráðlausum greiðslubúnaði.

Swatch vill eflaust ryðja sér rúms á snjallúramarkaðnum, sem fer æ vaxandi. Nýlega tilkynnti úraframleiðandinn Tag Heuer um snjallúr sem ætti að keppa við Apple Watch.

Úrið verður í ódýrari kantinum enda einfalt með tilliti til notkunarmöguleika. Það mun seljast á um 12-13 þúsund íslenskar krónur þegar það kemur fyrst út.