*

föstudagur, 20. apríl 2018
Innlent 11. apríl 2018 10:51

Tekjur fjölmiðla dregist saman um 17%

Hlutdeild Ríkisútvarpsins í heildartekjum fjölmiðla árið 2016 nam um 20%.

Ritstjórn
Hlutdeild RÚV í auglýsingatekjum fjölmiðla er um 15%.
Haraldur Guðjónsson

Tekjur fjölmiðla hafa dregist saman um 17% að raunvirði frá því er mest lét upp úr miðjum síðasta áratug. Samanlagðar tekjur fjölmiðla árið 2016 námu tæpum 27 milljörðum króna á verðlagi þess árs. Tæplega helmingur tekna fjölmiðla fellur til sjónvarps og því næst til dagblaða og vikublaða. 

Hlutdeild Ríkisútvarpsins í heildartekjum fjölmiðla árið 2016 nam um 20% en ef aðeins er litið til auglýsingatekna nam hlutdeild Ríkisútvarpsins 15%. 

Verulegur samdráttur varð í tekjum fjölmiðla í kjölfar efnahagshrunsins 2008. Frá árunum 2007 til 2010 lækkuðu tekjur fjölmiðla um fjórðung reiknað á verðlagi ársins 2016. Þrátt fyrir tilfinnanlegan samdrátt í tekjum er þetta þó talsvert minna en víða annars staðar en t.d. er áætlað að tekjusamdráttur fjölmiðla í Bandaríkjunum frá árinu 2008 sé um 40%. 

Mestu munar um samdrátt í auglýsingatekjum, en þær eru nú um fjórðungi lægri en þegar þær voru hæstar, reiknað á verðlagi 2016. Tekjur fjölmiðla af notendum hafa hins vegar lækkað um níu af hundraði. Síðustu ár hafa tekjur fjölmiðla lítillega hækkað og er nú svo komið að þær eru að raunvirði sambærilegar og skömmu eftir aldamótin.

Tekjusamdráttarins gætir á ólíkan hátt eftir miðlum. Hann er tilfinnanlega mestur í útgáfu blaða og tímarita, sem rekja má að miklu leyti til breyttrar fjölmiðlanotkunar með tilkomu nýrra og fjölbreyttari leiða við miðlun sjónvarps og myndefnis og sífellt aukinnar netnotkunar almennings. Tekjur af útgáfu blaða- og tímarita hafa þannig lækkað að raunvirði um 45 af hundraði frá árinu 2006. Á sama tíma eru tekjur hljóðvarps og sjónvarps að mestu sambærilegar og er mest var árið 2007 á meðan tekjur vefmiðla hafa hins vegar margfaldast á föstu verðlagi.