Íbúðalánasjóður samþykkti á dögunum kauptilboð Almenna leigufélagsins í Leigufélagið Klett ehf., en kaupverðið nemur rúmum 10 milljörðum króna. Almenna leigufélagið mun með kaupunum eignast 450 íbúðir Kletts og verða íbúðir í eigu félagsins alls um 1.000 að kaupum loknum.
Almenna leigufélagið er í eigu þriggja fagfjárfestasjóða sem reknir eru af sjóðstýringarfélaginu GAMMA, en félagið hefur undanfarin ár haslað sér völl á íslenskum leigumarkaði. María Björk Einarsdóttir, framkvæmdastjóri Almenna leigufélagsins, er ánægð með við bótina við eignasafnið.
Töldu eignirnar of lágt metnar
„Að okkar mati voru þessar eignir of lágt metnar og við sáum að hægt væri að gera góð kaup í þessu safni. Þessar íbúðir voru handvaldar frá Íbúðalánasjóði yfir í Klett sem íbúðir sem hentuðu vel í útleigu og það fyrsta sem þeir gerðu var að ráðast í miklar endurbætur. Eignasafnið er því í mjög góðu ásigkomulagi og allt saman í útleigu, auk þess sem við sáum vissulega mikla stærðarhagkvæmnismöguleika þar sem við erum nú þegar með rúmlega 500 eignir í rekstri,“ segir María Björk í samtali við Viðskiptablaðið.
Kaupverðið á Kletti var 1,5 milljörðum króna hærra en bókfært virði félagsins en María er fullviss um að gerð hafi verið góð kaup. „Eignirnar voru bókfærðar á fasteignamati og að okkar mati var eignasafnið mun meira virði. Eignirnar eru í sterkum bæjarfélögum, þriðjungur er á höfuðborgarsvæðinu og landsbyggðareignirnar eru í stöndugum bæjarfélögum með virkan fasteignamarkað.“
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .
