Kínverska tónlistarfyrirtækið Tencent Music hefur endurvakið áætlanir sínar um skráningu á hlutabréfamarkað í bandaríkjunum og hyggst safna 1,2 milljörðum dollara í útboði samkvæmt frétt BBC .
Gert er ráð fyrir að félagið sem er tónlistararmur Tencent Holdings samsteypunnar verði metið á um 25 milljarða dollara. Til samanburðar nam heildarmarkaðsverðmæti Spotify 26 milljörðum dollara þegar félagið var skráð á markað í apríl síðastliðnum. Markaðsvirði félagsins hefur sveiflast töluvert frá skráningunni en er nú á svipuðum slóðum og í apríl.
Notendur Tencent Music eru yfir 700 milljón talsins og þá nam hagnaður félagsins 394 milljónum dollara á fyrstu níu mánuðum ársins sem er 244% aukning frá sama tíma í fyrra.
