Í nýrri könnun MMR sem framkvæmd var 3. til 10 ágúst síðastliðinn segjast 61% svarenda hlynnt banni á einnota plastpokum í verslunum en tæp 41% kváðust mjög hlynnt og tæp 21% frekar hlynnt. Kváðust 21% svarenda vera andvíg banni á einnota plastpokum í verslunum en 9% kváðust mjög andvíg, samanlagt nærri þriðjungur eða 30%.

Eins og Viðskiptablaðið sagði frá um helgina hefur Bónus ákveðið að hætta notkun plastpoka, heldur bjóða í staðinn poka sem eru lífniðurbrjótanlegir sem og bjóða viðskiptavinum sínum 100 þúsund fjölnota burðarpoka.

Vinstri grænir ekki mestu fylgismenn banns

Stuðningsfólk Samfylkingar, eða 71% þeirra, Pírata, eða 69% þeirra og Vinstri grænna , eða 64% þeirra var líklegast til að vera fylgjandi banni á einnota plastpokum.

Þá var stuðningsfólk Sjálfstæðisflokksins eða 33% þeirra, Viðreisnar og Flokks fólksins líklegast til að vera andvígt banni en 28% stuðningsmanna síðastnefndu tveggja flokkanna voru andvíg. Konur voru líklegri, eða 69% þeirra, en karlar  til að vera hlynntar banni á einnota plastpokum, eða 69% kvenna á móti 54% karla.

Svarendur í yngsta aldurshópi, á milli 18-29 ára, voru líklegust til að vera fylgjandi banni á einnota plastpokum eða rétt um tveir þriðju þeirra. Andstaða við bann jókst í takt við hækkandi aldur. Af þeim sem lokið höfðu háskólamenntun kváðust 67% vera fylgjandi banni, samanborið við 60% þeirra með framhaldsskólamenntun og 56% þeirra með grunnskólamenntun.