Fimmtíu ár eru liðin frá því að fyrsti Toyotabíllinn var seldur á Íslandi, en um 45.000 bifreiðar af þessari gerið eru nú í notkun á landinu. Fyrstu bifreiðarinar sem komu til landsins árið 1965 voru Crown, Corona og Land Cruiser, en Corolla bættist svo við vörulínuna í kringum 1970.
„Við lítum á okkur fyrst og fremst sem þjónustufyrirtæki“ segir Úlfar Steindórsson, forstjóri Toyota á Íslandi og eigandi fyrirtækisins ásamt Kristjáni Þorbergssyni fjármálastjóra. „Svona fyrirtæki endist ekki lengi nema það átti sig á þörfum viðskiptavinanna og bjóði vöru sem hentar aðstæðum hér á landi. Við fylgjum því fordæmi sem Páll Samúelsson setti með starfsfólki sínu strax í upphafi og kappkostum á hverjum degi að standa okkur í því sem við erum að gera.“
Toyota hefur verið mest seldi bíllinn á Íslandi á hverju ári frá árinu 1991 eða í 25 ár samfellt. Ýmislegt verður gert til hátíðabrigða á árinu hjá Toyota á Íslandi. Verður til að mynda boðið upp á sérstaka afmælisútgáfu af Land Cruiser 150 - „Íslandsjeppans“ - en þar mun 33" breyting fylgja með í kaupunum án aukakostnaðar.
Algengasti bíllinn á Íslandi
Toyota Yaris og ToyotaCorolla eru algengustu bílarnir sem skráðir eru á Íslandi en yfir sex þúsund bílar eru skráðir af hvorri undirtegund. Þetta kom fram í úttekt Viðskiptablaðsins í október. Toyota á 5 af 10 algengustu bílunum á Íslandi.
