Donald Trump Bandaríkjaforseti tilkynnti í árlegri stefnuræðu sinni (e. state of the union address) í gær að hann hygðist funda á ný um kjarnorkumál með Kim Jong-Un, leiðtoga Norður-Kóreu, síðar í mánuðinum. Financial Times segir frá.

Trump fór yfir víðan völl í hinni 82-mínútna löngu ræðu, en meðal annars hét hann því enn á ný að reisa landamæramúrinn umdeilda, og tilkynnti um að sendir yrðu 3.750 hermenn að landamærunum við Mexíkó til að stöðva svokallaðar flóttamannalestir (e. migrant caravans).

Forsetinn talaði einnig fyrir samheldni, og varaði við að „fáránlegar flokkspólitískar rannsóknir“ kynnu að valda Bandaríkjunum skaða. Hann lýsti því ennfremur yfir að hefði hann ekki verið kjörinn forseti ættu Bandaríkin þessa stundina í umfangsmiklu stríði við Norður-Kóreu, sem gæti kostað milljónir mannslífa.