Skuldabréf til fjögurra ára sem Íslandsbanki hefur gefið út að andvirði 500 milljóna evra var nýlega selt til fjölbreytts hóps fjárfesta frá Bretlandi, Norðurlöndunum og meginlandi Evrópu, en rúmlega tvöföld umframeftirspurn var eftir útgáfunni.
Er útgáfan að andvirði 65 milljarða króna, en bréfið ber fasta 1,75% vexti sem jafngildir 200 punkta álagi yfir millibankavexti í evrum.
Ætlunin að fyrirframgreiða útistandandi skuldir
Lengir útgáfan endurgreiðsluferil bankans og lækkar fjármögnunarkostnað. Stendur til að nýta hluta útgáfunnar til að fyrirframgreiða útistandandi skuldir, þar með talið víkjandi skuldabréf sem er á gjalddaga árið 2019 að upphæð 138 milljónir evra.
Munu viðskiptin leiða til lækkunar á eiginfjárhlutfalli bankans úr 28,9% í 27,1%, ef miðað er við fjárhagstölur í lok júní 2016, en eftir sem áður er hlutfallið töluvert yfir kröfum eftirlitsaðila.
Segir fjárfesta hafa trú á rekstri bankans
"Við höfum náð góðum árangri við að auka breidd í fjármögnun bankans síðustu ár. Þessi útgáfa að upphæð 500 milljónir evra er þriðja skuldabréfaútgáfa Íslandsbanka í evrum og jafnframt þriðja erlenda skuldabréfaútgáfa bankans á árinu 2016.
Hagstæð þróun á vaxtaálagi undanfarnar vikur og umframeftirspurn eftir skuldabréfum bankans er kærkomið merki þess að fjárfestar hafa trú á rekstri Íslandsbanka, hagfelldu efnahagsumhverfi á Íslandi og þeim ábyrgu skrefum sem tekin hafa verið í átt til losunar fjármagnshafta.
Þessi útgáfa gerir okkur kleift að endurgreiða óhagstæðari fjármögnun, og með því stígur bankinn mikilvægt skref í átt til þess að vera að fullu fjármagnaður á markaði. Bætt aðgengi að erlendum fjármagnsmörkuðum mun einnig nýtast vel þeim viðskiptavinum okkar sem þurfa fjármögnun í erlendri mynt," segir Birna Einarsdóttir bankastjóri Íslandsbanka í fréttatilkynningu.
Umsjónaraðilar útboðsins voru Bank of America Merrill Lynch, Citigroup, Deutsche Bank AG, JP Morgan og DNB. Verður útgáfan gefin út undir 1,5 milljarða Bandaríkjadala Global Medium Term Notes (GMTN) útgáfuramma bankans.
