Nettótekjur ríkisins af fyrstu 70% framteljanda (raðað eftir tekjum) eru neikvæðar í tekjuskattskerfi einstaklinga að teknu tilliti til útsvarsgreiðslna og vaxta- og barnabóta. Í rauninni eru það aðeins tekjuhæstu 30% framteljenda sem standa undir tekjum ríkissjóðs af tekjuskattskerfinu. Þetta kemur fram í nýrri frétt á vef fjármála- og efnahagsráðuneytisins .
Þar kemur fram að ráðuneytið hafi tekið saman upplýsingar um tekjuskattsgreiðslur einstaklinga og dreifingu eftir tekjutíundum að teknu tilliti til útsvars og vaxta- og barnabóta. Upplýsingarnar eru unnar upp úr álagningaskrá ríkisskattstjóra.
Heildartekjur samanstanda m.a. af launatekjum, tekjum af atvinnurekstri, greiðslum frá lífeyrissjóðum og tekjum greiddum af ríkissjóði svo sem atvinnuleysisbótum, örorku- og ellilífeyri frá Tryggingastofnun. Aðrir skattar sem einstaklingar kunna að greiða, til að mynda virðisaukaskattur og fjármagnstekjuskattur, eru ekki hluti af umfjölluninni.
Nettótekjur ríkissjóðs af tekjuskatti árið 2013 voru liðlega 95 milljarðar króna að teknu tilliti til þátttöku ríkissjóðs í útsvarsgreiðslum til sveitarfélaga, en þær námu 10,4 milljörðum króna, og barna- og vaxtabóta , sem námu 17,5 milljörðum króna.
Heimilin greiða að meðaltali 1,2 m.kr. í tekjuskatta þar af fara að meðaltali 733 þúsund kr. í útsvar. Meðaltekjur ríkissjóðs eru þannig 471 þúsund kr. á heimili. Efsta tekjubilið er eina tekjubilið sem greiðir að meðaltali hærri fjárhæð í tekjuskatt til ríkissjóðs en útsvar til sveitarfélaga.
