*

miðvikudagur, 14. nóvember 2018
Innlent 23. janúar 2018 10:59

Undirbúa framboð í borginni

Nýstofnað Miðflokksfélag í Reykjavík óskar eftir framboðum sem vilja láta til sín taka í borgarmálunum.

Ritstjórn
Sigmundur Davíð Gunnlaugsson er formaður Miðflokksins

Formlegur stofnfundur Miðflokksfélags Reykjavíkur fór fram í Rúgbrauðsgerðinni í gærkvöld, 22. janúar, en gestir fundarins voru þeir Sigmundur Davíð Gunnlaugsson formaður Miðflokksins og Þorsteinn Sæmundsson þingmaður Reykjavíkurkjördæmis Suður. Nýstofnað Miðflokksfélag Reykjavíkur mun m.a. standa fyrir öflugu félagsstarfi og hafa umsjón með undirbúningi framboðs Miðflokksins til borgarstjórnar í Reykjavík fyrir kosningarnar vorið 2018.

Miðflokksfélag Reykjavíkur er þriðja nýstofnaða kjördæmafélag Miðflokksins, en félagið mun starfa fyrir bæði Reykjavíkurkjördæmin. Félagið hefur skv. nýsamþykktum lögum þess þann tilgang að vinna að bættum hag íbúa Reykjavíkur og gæta hagsmuna þeirra á vettvangi lands- og sveitarstjórnarmála. 

Í stjórn Miðflokksfélags Reykjavíkur voru kosin þau Reynir Þór Guðmundsson formaður, Valgerður Sveinsdóttir, Steinunn Anna Baldvinsdóttir, Sigurjón Jónsson og Kristján Hall.  Varastjórn skipa Viðar Freyr Guðmundsson, Kristín Jóna Grétarsdóttir og Sólveig Daníelsdóttir. 

Félagið óskar því eftir framboðum frá áhugasömum einstaklingum sem vilja láta til sín taka í borgarmálunum. Áhugasömum er bent á að hafa samband við Miðflokksfélag Reykjavíkur á tölvupósti reykjavik@midflokkurinn.is eða í síma 863-4000.