*

sunnudagur, 23. september 2018
Innlent 6. maí 2018 11:19

Vampírur sem þvælast fyrir öðrum

Erlendur ferðamálaráðgjafi segir að Íslendingar ættu að draga verulega úr fjölda þeirra ferðamanna sem hingað koma með skemmtiferðaskipum.

Ritstjórn
Spáð er að 150.000 ferðamenn komi hingað til lands í ár á skemmtiferðaskipum.
Haraldur Guðjónsson

Íslendingar ættu að draga verulega úr fjölda þeirra erlendu ferðamanna sem koma hingað til lands með skemmtiferðaskipum, að mati erlends ráðgjafa í ferðamálum. Þeir eyði litlu og taki upp mikið pláss.

„Þessir ferðamenn eru vampírur,“ segir Doug Lansky, ferðamálaráðgjafi, en rætt var við Lansky í kvöldfréttum RÚV í gær.

„Þeir sjúga blóð og menningu úr viðkomustöðum sínum. Þeir eyða litlum peningum og fara svo á næsta áfangastað. Þessir ferðamenn þjóna ekki hagsmunum ykkar.“

Fyrsta stóra skemmtiferðaskip sumarsins kom til Reykjavíkur í vikunni með 2.800 farþega um borð. Gert er ráð fyrir að um 150 þúsund slíkir ferðamenn komi til Íslands á þessu ári, sem er um 6% af þeim 2,4 milljónum ferðamanna spáð er að muni sækja landið heim. Þeir koma hingað til lands nær eingöngu yfir sumartímann.

Lansky segir farþega skemmtiferðaskipa ganga mjög á auðlindir og þvælast fyrir verðmætari gestum –svo sem hótelgestum. Þeir fjölmenni allir á sama tíma á einn stað, hverfa svo á brott og endurtaka leikinn á öðrum stað. Sérstaklega hafi það mikil áhrif í litlum bæjarfélögum.

„Þessir farþegar verja ekki miklu fé. Þeir taka bara mikið pláss. Þið þurfið að forgangsraða og umbuna bestu viðskiptavinunum eins og hvert annað fyrirtæki,“ segir Lansky.