Merkja má aukna bjartsýni varðandi efnahagsumhverfið meðal íslenskra fjármálastjóra, en meiri varkárni gætir varðandi rekstrarumhverfi fyrirtækja.
Kemur þetta fram í niðurstöðum fjármálastjórakönnunar ráðgjafarsviðs Deloitte meðal stærstu fyrirtækja á Íslandi. Tilgangur hennar er að sýna mat fjármálastjóra á stöðu fyrirtækja og efnahagsumhverfisins.
Þessi könnun er gerð tvisvar á ári og er þetta í fjórða sinn sem könnunin er framkvæmd. Sendur var spurningalisti til fjármálastjóra 300 stærstu fyrirtækja landsins.
Aðspurðir telja um 83% fjármálastjóra að hagvöxtur muni aukast á næstu tveimur árum en fyrir einu ári síðan töldu um 57% fjármálastjóra von á auknum hagvexti.
Bjartsýni ríkir um hlutabréfamarkaðinn og telja fjármálastjórar að Úrvalsvísitala Kauphallarinnar muni hækka nokkuð á næstu sex mánuðum.
Hafa áhyggjur af kjarasamningum og vaxtastigi
Niðurstöður sýna að áfram er ákveðin óvissa í rekstrarumhverfi fyrirtækja og að fjárhagslegar horfur eru óbreyttar.
Helstu ytri áhættuþættir í rekstri fyrirtækja sem voru nefndir eru áhrif kjarasamninga, vaxtastig og verðbólga. Í kjölfar síðustu vaxtahækkunar Seðlabankans í byrjun nóvember telja 97% fjármálastjóra stýrivexti of háa.
Meirihluti fjármálastjóra telur að mikið framboð af lánsfé sé til staðar en að kostnaður við lánsfé sé hár.
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .
