Velta í hinu svokallaða viðskiptahagkerfi nam rúmum 4.000 milljörðum króna í fyrra og jókst um 100 milljarða, eða 2,6%, milli ára. Eigið fé nam tæpum 3.000 milljörðum og jókst um 6% milli ára, og eiginfjárhlutfall var 42% og jókst lítillega. Þetta kemur fram í frétt á vef hagstofunnar .

Viðskiptahagkerfið er skilgreint sem allur fyrirtækjarekstur á Íslandi að undanskilinni lyfjaframleiðslu, fjármála- og vátryggingastarfsemi, og opinberri starfsemi. Tölurnar eru fengnar úr skattframtölum fyrirtækja og tæp 39 þúsund framtöl fyrirtækja með 124 þúsund launþega liggja að baki tölunum fyrir síðasta ár.

Helstu breytingar milli ára þegar litið er til hækkunar rekstrartekna eru í fiskeldi, þar sem rekstrartekjur jukust um 4,9 milljarða (34%), mannvirkjagerð um 6,2 milljarða (33%) og starfsemi á sviði upplýsingaþjónustu um 3,7 milljarða (27%).

Meðal atvinnugreina þar sem rekstrartekjur lækkuðu hvað mest voru framleiðsla á kvikmyndum o.fl., 4,2 milljarðar (-18%) og sjávarútvegur, þar sem rekstrartekjur lækkuðu um 44 milljarða (-13%).

Mikill vöxtur hefur verið í byggingarstarfsemi og mannvirkjagerð og jukust rekstrartekjur um 19% milli áranna 2016 og 2017, úr 299 milljörðum í 356 milljarða. Mikill vöxtur var einnig árið áður og hafa rekstrartekjur í atvinnugreininni vaxið um rúmlega 50% frá 2015.

Þá hækkaði launakostnaður í greininni um 19% og virðist hann því haldast í hendur við tekjuaukningu. Fjöldi launþega í greininni hefur vaxið mikið frá árinu 2015 eftir að hafa verið nokkuð stöðugur frá árinu 2009. Nú eru 12.000 launþegar í greininni eða um 36% fleiri en 2015 þegar tæplega 9 þúsund störfuðu í greininni. Hafa ekki fleiri starfað við byggingarstarfsemi og mannvirkjagerð síðan árið 2008.

Eiginfjárhlutfall í greininni hækkaði um 2,3 prósentustig milli ára og er 25%, en eigið fé hækkaði um tæplega 30%. Hagnaður fyrir fjármagnsliði og skatta (EBIT) hækkaði um 22,5%, úr 34 milljörðum í 41 milljarð milli ára.

Rekstrartekjur fyrirtækja í fiskeldi jukust um 34% en þær jukust einnig mikið árið áður og hafa rekstrartekjur í fiskeldi rúmlega tvöfaldast frá árinu 2015. Viðsnúningur hefur því orðið í greininni en hagnaður fyrir fjármagnsliði jókst um rúmlega 2,6 milljarða frá árinu áður og er nú 900 milljónir en tapið nam 1,7 milljörðum árið áður. Eigið fé hefur því aukist um 28% frá fyrra ári, er nú 22 milljarðar, og eiginfjárhlutfall er nú yfir 50%.

Rekstrartekjur fyrirtækja í sjávarútvegi lækkuðu á milli áranna 2016 og 2017. Á móti kemur að rekstrarkostnaður lækkaði einnig og þá voru fjármagnsliðir til lækkunar. Hagnaður samkvæmt ársreikningi lækkaði því á milli ára um 12,2 milljarða (25%). Þá hækkuðu langtímaskuldir sjávarútvegsfyrirtækja um 5,3% og eigið fé jókst um 4,7%.

Einkennandi greinar ferðaþjónustu héldu áfram að vaxa en þó ekki af sama krafti og undanfarin ár. Þannig jukust rekstrartekjur um 6% milli ára, helmingi minna en árið áður, og voru þær 590 milljarðar árið 2017.

Launþegum í greininni heldur áfram að fjölga og voru þeir rúmlega 26 þúsund, sem er aukning um 8% milli ára. Þá minnkaði hagnaður fyrir fjármagnsliði um 38%, úr 45 milljörðum í 28 milljarða. Munaði þar mestu um 19% hækkun launakostnaðar meðan aðrir kostnaðarliðir hækkuðu um 7% til 9%.