*

mánudagur, 24. júlí 2017
Innlent 29. júní 2017 09:42

Verðbólgan óbreytt milli mánaða

Vísitala neysluverðs breyttist ekki milli maí og júnímánaðar, en án húsnæðisliðar má merkja verðhjöðnun.

Ritstjórn
Haraldur Guðjónsson

Vísitala neysluverðs er óbreytt milli mánaða og var hún 443,0 stig í júnímánuði, líkt og í maí. Vísitala neysluverðs án húsnæðis er 386,0 sem er lækkun um 0,41% frá maí 2017.

Ef horft er til síðustu tólf mánaða hefur vísitala neysluverðs hins vegar hækkað um 1,5%, en vísitalan án húsnæðis lækkað um 3,1% að því er Hagstofan greinir frá. Verðbólgan nemur því um 1,5% með húsnæði, en án húsnæðis má merkja verðhjöðnun.

Þegar breytingin milli mánaða er skoðuð sést að kostnaður vegna búsetu í eigin húsnæði hækkaði um 1,2%, meðan verð á mat og drykkjarvörum lækkaði um 1,2%. 

Flugfargjöld til útlanda hafa hins vegar hækkað um 11,6%, og verð á fötum um 3,5%, meðan vörur og þjónusta tengd tómstundum og menningu hefur lækkað um 1,2%.