*

miðvikudagur, 22. maí 2019
Innlent 16. nóvember 2018 13:58

Verðlaunuðu fyrir góða notkun á íslensku

Hvatningarverðlaun viðskiptalífsins um eftirtektaverða notkun á íslenskri tungu voru veitt í fyrsta skipti í dag.

Ritstjórn
Katrín Olga Jóhannesdóttir sat í dómnefndinni.
Aðsend mynd

Sannkölluð hátíðarstund var í húsakynnum Arion Banka í morgun þar sem hvatningarverðlaun viðskiptalífsins um eftirtektaverða notkun á íslenskri tungu voru veitt í fyrsta skipti, á degi íslenskrar tungu. Þetta kemur fram í fréttatilkynningu frá Viðskiptaráði Íslands.

Viðskiptaráð Íslands, Stofnun Árna Magnússonar í íslenskum fræðum og Festa - miðstöð um samfélagsábyrgð kölluðu eftir tilnefningum til hvatningarverðlauna viðskiptalífsins um eftirtektarverða notkun á íslenskri tungu á dögunum. 

MS hlaut heiðursverðlaun

Dómnefnd hvatningarverðlaunanna taldi sérstaklega þörf á að bæta við heiðursverðlaunum til þess að þakka Mjólkursamsölunni fyrir framtak sitt um áratugaskeið við að hefja móðurmálið til vegs og virðingar, og um leið hvetja fyrirtækið áfram til góðra verka á þessu sviði í framtíðinni. Mjólkursamsalan hlaut því fyrstu heiðursverðlaun hvatningarverðlaunanna.

Sjö fyrirtæki voru sérstaklega heiðruð fyrir framlag sitt í þágu íslenskunnar; Brandenburg, Icelandair Hotels, Icelandair, IKEA, ÍSAL, Sýn og Toyota á Íslandi.

Brandenburg hlaut hvatningarverðlaun

Hvatningarverðlaun ársins 2018 hlaut Brandenburg fyrir einstaklega vandaða, skapandi, frumlega, skemmtilega og eftirtektaverða notkun á íslenskri tungu. 

Þórarinn Eldjárn flutti hugvekju um íslenska tungu, Eliza Reid, forsetafrú Íslands tók til máls og gaf íslensku þjóðinni nýyrðið ,,ókunningi" ásamt því að afhenda hvatningarverðlaunin. Framkvæmdastjóri Viðskiptaráðs, Ásta S. Fjeldsted, stýrði athöfninni og Ragnheiður Gröndal flutti Íslenskuljóð ásamt Guðmundi Péturssyni og tryggði endanlega að gestir færu svífandi út í daginn með íslenskuna efsta í huga.

Dómnefnd hvatningarverðlaunanna skipuðu Katrín Olga Jóhannesdóttir, formaður Viðskiptaráðs Íslands, Ari Páll Kristinsson, rannsóknarprófessor hjá Árnastofnun og Hrafn Loftsson, dósent við tölvunarfræðideild.

25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim