Viðskiptabannið á Rússa kom hart við íslenska hagsmuni

„Það er tímafrekt að finna nýja markaði og dýrkeypt að missa markaðsaðgang þegar búið er að koma honum á,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, í aðsendri grein í Viðskiptablaðinu .

Hún segir ákvörðun Rússa um að banna innflutning á tilteknum matvælum hafa komið sér mjög illa fyrir íslenskan sjávarútveg. Hlutfallslega hafi hún komið harðar niður á íslenskum hagsmunum en hagsmunum annarra ríkja. Í síðasta mánuði framlengdu Rússar bannið og gildir það nú til loka ársins 2018.

„Íslensk sjávarútvegsfyrirtæki höfðu komið ár sinni ágætlega fyrir borð í Rússlandi og það væri hentugt fyrir sjávarútveginn að vita hvort íslensk stjórnvöld ætli að gefa þessum mikilvægu, en að því er virðist gleymdu, hagsmunum gaum,“ segir Heiðrún Lind.