Á morgunverðarfundi sem Viðskiptaráð Íslands stóð nýverið fyrir um stöðu og horfur í ríkisfjármálum, þar sem fram kom að rekstraraðlögun ríkisins frá efnahagshruni hafi að mestum hluta verið í formi aukningar skatttekna og samdráttar í fjárfestingum í stað aðhalds í rekstrar- og launakostnaði.

BSRB sendi frá sér fréttatilkynningu í morgun þar sem því var haldið fram að tölur Viðskiptaráðs um opinber störf væru rangar. Störfum hjá ríkinu hefði fækkað um 10,6% frá árinu 2008 og ef litið væri aftur til aldamóta mætti sjá að starfsmönnum ríkisins hefði fjölgað um 5,6% frá árinu 2000 meðan fjöldi á almennum vinnumarkaði hefði aukist um 11,8%. Þetta stangaðist á við fullyrðingar Viðskiptaráðs sem segðu að ríkisstarfsmönnum hefði fjölgað um 29% frá aldamótum og að aðhaldsaðgerðir síðustu ára hefði ekki fækkað starfsmönnum ríkisins frá 2008 til 2014 nema um 3%.

Stangast á við opinberar upplýsingar

Viðskiptaráð segir að stærsta misræmið í tölum þess og BSRB megi finna í fjölda ríkisstarfsmanna um síðustu aldamót. Í tölum BSRB sé fullyrt að stöðugildi hjá ríkinu hafi verið 15.700 árið 2000 og vísað sé til upplýsinga frá fjármálaráðuneytinu án þess að beinnar heimildar sé getið. Viðskiptaráð segir hins vegar að þessi fullyrðing stangist á við opinberar upplýsingar frá sama ráðuneyti og vísar til þess að í svari fjármálaráðherra við fyrirspurn á Alþingi þann 19. nóvember 2009 komi fram að fjöldi stöðugilda hjá ríkinu hafi verið 14.000 á árinu 2000.

BSRB yfirsást tvennt

Þá segir Viðskiptaráð að BSRB hafi yfirsést tvennt þegar það fullyrti að störfum hjá ríkinu hefði fækkað um 10,6% frá árinu 2008, en ekki 3% líkt og Viðskiptaráð heldur fram. Í fyrsta lagi hafi stór málaflokkur, málefni fatlaðra, verið fluttur frá ríkinu til sveitarfélaga árið 2011 og þá hafi 905 stöðugildi færst milli þessara aðila. Ef bera eigi saman tölur fyrir og eftir þessa tilfærslu beri að leiðrétta fyrir henni. Í öðru lagi hafi Viðskiptaráð miðað við árið 2009 í útreikningum sínum en ekki 2008 líkt og BSRB hafi talið.

Segir loks í tilkynningu Viðskiptaráðs að skilaboð þess um að fjölgun starfa hjá hinu opinbera hafi verið verulega umfram fjölgun á almennum vinnumarkaði standi óhögguð. Sé litið til fjölda opinberra starfsmanna í heild, bæði hjá ríki og sveitarfélögum, megi sjá að þeim hafi fjölgað um 29% frá aldamótum (úr 28.700 stöðugildum árið 2000 í 36.880 árið 2014 samkvæmt fjármálaráðuneytinu og Sambandi íslenskra sveitarfélaga). Á sama tíma hafi fjölgun starfa á almennum vinnumarkaði numið 10% (úr 107.439 ársverkum árið 2000 í 118.706 ársverk árið 2014 samkvæmt tölum frá Seðlabanka Íslands). Aukning í fjölda opinberra starfsmanna á tímabilinu sé því nær þreföld á við almennan vinnumarkað.