Jón Gunnarsson samgönguráðherra vonast til þess að hægt verði að hefja framkvæmdir við nýja flugstöð í Vatnsmýri á næsta ári að því er kemur fram í Morgunblaðinu . „Það er í mínum huga mikilvægt að hefja sómasamlega uppbyggingu á aðstöðu fyrir farþega og starfsmenn í Vatnsmýri,“ er haft eftir ráðherranum.
Jón hyggst enn fremur skipa starfshóp sem falið verður að meta flugvallarkosti fyrir innanlandsflugið og mun hópurinn taka við af Rögnunefndinni. Niðurstaða þeirrar nefndar var sú að Hvassahraun væri heppilegasti staðurinn fyrir innanlandsflug. Fulltrúar ríkisins, Reykjavíkur og Icelandair áttu sæti í Rögnunefndinni, en samgönguráðherra vill að fulltrúar landsbyggðarinnar taki jafnframt sæti í nýja starfshópnum.