*

föstudagur, 16. nóvember 2018
Innlent 15. október 2014 18:00

Vill vita hvort RÚV uppfylli lagaskyldur

Katrín Jakobsdóttir, formaður VG, vill vita hvort fjölmiðlanefnd þyki RÚV uppfylla almannaþjónustuhlutverk sitt.

Ritstjórn
Haraldur Guðjónsson

Katrín Jakobsdóttir, formaður VG, vill vita hvort fjölmiðlanefnd þyki RÚV uppfylla almannaþjónustuhlutverk sitt. Þetta kemur fram í fyrirspurn sem Katrín lagði fram á Alþingi í dag og er beint til Illuga Gunnarsson, mennta- og menningarmálaráðherra.

Í fyrirspurninni segir: „Hefur fjölmiðlanefnd lagt mat á það hvort Ríkisútvarpið hafi uppfyllt almannaþjónustuhlutverk sitt eins og gert er ráð fyrir í 15. gr. laga um Ríkisútvarpið, fjölmiðil í almannaþágu, nr. 23/2013?“

Fjölbreytt hlutverk RÚV

Í lögum um Ríkisútvarpið sem voru sett árið 2013 er hlutverk RÚV skilgreint. Fjölmiðlinum ber meðal annars að ábyrgjast að sanngirni og hlutlægni sé gætt í frásögn, sannreyna að heimildir séu réttar og að gæta sanngirni í framsetningu, meðal annars með því að vera óháð stjórnmálalegum, hugmyndafræðilegum og efnahagslegum hagsmunum í efnismeðferð.

Þá ber RÚV að kynna margbreytileika mannlífs, lífsviðhorfa og lífsskilyrða og vera vettvangur fyrir mismunandi skoðanir og kynna ólík sjónarmið í umfjöllun sinni. Katrín vill meðal annars vita hvort fjölmiðlanefnd telji þessum atriðum fullnægt af RÚV, en nefndinni ber skylda til þess að leggja mat á hvort RÚV uppfylli áskilnað laganna.