Héraðsdómur Reykjavíkur dæmdi í gær Vátryggingarfélag Íslands hf. til að greiða Lífsverki rúmlega 852 milljónir króna auk vaxta og dráttavaxta sem nema samtals um 416 milljónum króna. Um er að ræða kröfu Lífsverks í ábyrgðartryggingu stjórnar og stjórnenda, þar sem VÍS er vátryggjandi.
Í tilkynningu VÍS til kauphallar , kemur fram að félagið sé endurtryggt gagnvart tjónum sem þessum að stærstum hluta. Endurtryggingastefna félagsins geri ráð fyrir að ekkert stakt tjón geti lækkað gjaldþol þess um meira en þrjú prósent. Fjárhæðin sem fallið getu í hlut VÍS í þessu máli sé því innan marka stefnunnar og hafi að stórum hluta verið færð í tjónaskuld félagsins frá árinu 2013.
Ágreiningur félaganna snérist um tvær fjárfestingar sem þáverandi stjórn og stjórnendur lífeyrissjóðsins tóku ákvarðanir um, í mars og september 2008. Um var að ræða fjárfestingar í svonefndum lánshæfistengdum skuldabréfum (e. credit linked notes), sem gefin voru út af svissneska bankanum UBS AG, Jersey Branch, en fjárfestingar þessar voru gerðar fyrir milligöngu Landsbanka Íslands.
Lífsverk byggði m.a. á því að ákvarðanir fyrrum stjórnenda sjóðsins og umræddar fjárfestingar samkvæmt þeim hafi verið ólögmætar þar sem þær hafi stangast á við þær fjárfestingarheimildir sem lífeyrissjóðir njóta skv. 36.gr. laga nr. 129/1997 um skyldutryggingu lífeyrisréttinda og starfsemi lífeyrissjóða.
VÍS hefur þegar tekið ákvörðun um að áfrýja dómnum til Hæstaréttar.