*

fimmtudagur, 15. nóvember 2018
Innlent 3. september 2018 14:32

VÍS sektað um 2 milljónir

VÍS hefur gert samkomulag við Fjármálaeftirlitið um greiðslu sektar og viðurkenningu brots eftir að hafa láðst að birta tilkynningu.

Ritstjórn
Helgi Bjarnason er forstjóri VÍS.
Eva Björk Ægisdóttir

Tryggingafélagið VÍS hefur gert samkomulag við Fjármálaeftirlitið um að greiða 2 milljónir króna í sekt og viðurkenna brot á lögum um verðbréfaviðskipti, eftir að því láðist að birta flöggunartilkynningu í tæpa 4 mánuði.

Forsaga málsins er sú að 17. nóvember 2017 tilkynnti fjárfestingasjóður Eaton Vance tryggingafélaginu að atkvæðisréttur sinn hefði farið undir 5% mörkin, eins og lög gera ráð fyrir.

VÍS bar þá lögum samkvæmt skylda til að birta tilkynninguna eigi síðar en á hádegi næsta dag. Hún var hinsvegar ekki birt fyrr en tæpum 4 mánuðum síðar, þann 7. mars 2018.

Í gagnsæistilkynningu frá Fjármálaeftirlitinu um málið, sem birt var á föstudag, segir einnig: „Við ákvörðun sektarfjárhæðar hefur Fjármálaeftirlitið litið til mikilvægis flöggunartilkynninga en þeim er ætlað að treysta gagnsæi fjármálamarkaðar með því að upplýsa um þá sem ráða yfir verulegum hlut atkvæðisréttar í útgefanda og eru líklegir til að hafa áhrif á stjórnun hans. Sektarfjárhæðin tók ennfremur mið af tímalengd brotsins og að málsaðili upplýsti sjálfur um brotið.“

Samkomulagið felur ennfremur í sér að VÍS grípi til ráðstafana til að stuðla að því að atvik sem þetta eigi sér ekki stað á ný.

Stikkorð: FME VÍS