Sigmundur Davíð Gunnlaugsson, þingmaður Framsóknarflokksins og fyrrverandi forsætisráðherra, segir að nú standi til að verðlauna hrægammana sem vildu ekki spila með í gjaldeyrisútboðinu sem átti að vera það síðasta.

Vísar hann þar í ákvarðanir ríkisstjórnarinnar í gær um að á sama tíma og höftum var aflétt þá hafi aflandskrónueigendum verið boðið nýtt verð fyrir krónueignir sínar.

„Óttinn reyndist réttur“

Eins og Viðskiptablaðið hefur fjallað um segir Benedikt Jóhannesson fjármálaráðherra að Íslendingar hefðu grætt á því að bjóða aflandskrónueigendunum betra verð á sínum tíma, miðað við gengisþróunina síðan þá.

Sigmundur segir í færslu sinni að aðgerðir Íslendinga til að endurreisa efnahagslíf landsins og aflétta höftum hafi verið einstakar í fjármálasögu heimsins og þær hafi heppnast fullkomlega.

„En í stað þess að klára planið eins og lagt var upp með og gera þetta að sigurdegi virðist stjórnvöld ætla að nota tækifærið til að leysa vogunarsjóðina út með gjöfum, alla á einu bretti.

Óttinn reyndist réttur," segir Sigmundur á facebook síðu sinni en hann segir þá aflandskrónueigendur sem ekki tóku þátt í útboðinu hafa ákveðið þess í stað að beita áróðri og undirróðri til að hafa áhrif á íslensk stjórnmál.

Var gert ljóst að myndu setja fastir í mörg ár

„Stjórnvöld voru á sínum tíma búin að gera mönnum ljóst að þeir sem tækju ekki þátt sætu eftir og gætu setið fastir á lágum eða engum vöxtum í mörg ár.

Fyrir vikið voru þeir sem trúðu því að stjórnvöldum væri alvara reiðubúnir til að borga 190 krónur fyrir hverja evru þegar skráð gengi var um 139 krónur.

Veðjuðu á að brjóta stjórnvöld á bak aftur

Þeir sem höfðu séð merki þess að hægt væri að brjóta stjórnvöld a bak aftur tóku ekki þátt og nú fá þeir að kaupa evruna á ca. 137 krónur.

Sá sem hefði fengið 100 milljón evrur með því að taka þátt í útboðinu fær nú rúmlega 138 milljón evrur. Það er hægt að kaupa margar auglýsingar og ráða marga PR-menn fyrir slíkan mun.

Planið gekk upp hjá vogunarsjóðunum. Þeir fengu kosningar, nýja ríkisstjórn, nýja stefnu og nýtt verð. „Special price for you my friend“.“