Fjárfestar hafa fylgst náið með viðskiptaviðræðum milli Kína og Bandaríkjanna að undanförnu, en fulltrúar þjóðanna sátu í níu klukkustundir á fundum í gær. Hlutabréf vestra hækkuðu við opnun markaða í dag og segja fréttaskýrendur það til marks um aukna bjartsýni á að viðsemjendur muni ná saman fyrir 1. mars nk. þegar frestur til að ná samkomulagi rennur út.

Þriðja lota samningaviðræðnanna, sem varað hafa í jafnmargar vikur, lýkur í dag og í kjölfarið mun formaður samninganefndar Kína hitta Trump Bandaríkjaforseta og ræða framgang viðræðnanna.

Hins vegar bendi margir greinendur á að þrátt fyrir góðan gang í viðræðunum síðastliðna viku þá standi enn alvarlegustu deilumálin út af borðinu. Ekki síst óttast menn að samningar kunni að sigla í strand þegar höfundaréttur í hug- og vélbúnaði komi til umræðu, en meint brot á höfundarétti í hátækni hafi borið hæst í gagnrýni Trump á viðskiptahætti Kínverja.

Þannig greinir Wall Street Journal frá því að mikið beri enn á milli í afstöðu til þeirrar kröfu Bandaríkjanna að Kína láti af brotum á höfundarétti og niðurgreiðslum til tæknifyrirtækjum í eigu ríkisins, Financial Times segir auk þess frá því að viðsemjendur reyni nú að ná sáttum í langvarandi deilu örgjafaframleiðandanna Micron Technology og Fujian Jinhua, en bandarískir ráðamenn hafa lengi vísað til deilunnar sem dæmi um ósanngjarna viðskiptahætti að hálfu kínverskra yfirvalda.