Í hlutafjárútboði Skeljungs sem lauk í gær klukkan 16:00 var fullnýtt heimild um að selja allt að 31,5% hlut í félaginu, og var hann seldur fyrir 4,6 milljarða króna samkvæmt fréttatilkynningu um málið.
Eins og Viðskiptablaðið fjallaði um í gær hafði félagið heimild til að selja frá 23,3% til 31,5% hlutar í félaginu, en mikil umframeftirspurn var í útboðinu.
Tóku 2.500 fjárfestar þátt í úboðinu og nam heildareftirspurn yfir 12 milljörðum króna. Fengu þeir 2.000 fjárfestar sem gátu keypt hluti sína á genginu 6,9, sem þýðir að markaðsvirði Skeljungs er um 14,5 milljarðar króna.
Óskertar áskriftir hjá þeim sem buðu yfir tilboðsverði
„Í ljósi mikillar eftirspurnar ákváðu Arion banki hf. og SÍA II slhf. að fullnýta heimild sína til að stækka útboðið. SF IV slhf. selur í útboðinu 23,5% hlut í Skeljungi hf., Arion banki 4% og SÍA II 4%,“ segir í tilkynningunni.
„Fyrir liggur að 11,75% hlutur verður seldur til fjárfesta í tilboðsbók A (þar sem mögulegt verðbil var 6,1-6,9 kr./hlut) og 19,75% hlutur seldur til fjárfesta í tilboðsbók B (þar sem lágmarksgengi var 6,1).
Fjárfestar í tilboðsbók A fá úthlutað ríflega helming þess sem þeir óskuðu eftir að kaupa, nema áskriftir verða ekki skertar undir 500 þúsund krónur.
Áskriftir sem bárust á verði yfir 6,9 krónur á hlut í tilboðsbók B verða óskertar en úthlutun til fjárfesta með áskriftir á útboðsgenginu nemur um fjórðungi af áskrift.“
Aftur inn á hlutabréfamrkað 9. desember
Er áætlað að viðskipti hefjist með hlutabréfin föstudaginn 9. desember næstkomandi.
"Það er afar ánægjulegt að sjá þessa góðu niðurstöðu í útboðinu. Hún tryggir leið Skeljungs aftur inn á hlutabréfamarkað eftir að hafa starfað sem óskráð félag í ríflega áratug,“ er haft eftir Valgeiri, M. Baldurssyni, forstjóra Skeljungs í tilkynningunni.
„Þessi áfangi er mikilvægt skref fyrir fyrirtækið, starfsfólk, hluthafa og viðskiptavini. Við hjá Skeljungi hlökkum til að takast á við framtíðina í skráðu félagi og bjóðum nýja hluthafa hjartanlega velkomna í hópinn."
