*

föstudagur, 16. nóvember 2018
Týr
25. maí 2018 10:01

Kosninganótt

Reykjavíkuríhaldið þykist visst um að geta fengið flest atkvæði, en það mun mikið velta á kjörsókn og annarri skiptingu atkvæða.

Aðrir ljósmyndarar

Laugardagskvöldið verður örugglega ekki minna spennandi en Eurovision-kvöldið um daginn. Úrslit víða aldrei tvísýnni en nú og ekki ósennilegt að einhverjir verði að gera sér allrasíðasta sætið að góðu. Og það er líka víst að þeir munu flestir gera það með sigurbros á vör og útskýra að þar hafi unnist frækinn varnarsigur.

                             ***

Sennilega verður mesta spennan þó í Reykjavík, með sextán lista í framboði og ríflega hálft prósent kjörskrárinnar í framboði. Miðað við skoðanakannanir verður erindisleysa um helmings frambjóðenda þeim loksins ljós, þó aðrir kjósendur hafi áttað sig á því löngu áður. En það getur fimmtungur atkvæða farið í súginn.

                             ***

En miði er möguleiki um þægilega innivinnu, svo þegar svo margir eru um hituna og fremur lakri kjörsókn spáð, þá getur margt skrýtið gerst á kosninganótt.

                             ***

Ekki síst á það við á vinstri vængnum. Vinstri græn hafa þannig eftirlátið borgarstjóranum sviðsljósið á kosningafundum meirihlutans (mikið til á kostnað útsvarsgreiðenda) og vonuðust eftir því að molarnir af borðum hans dygðu fyrir tveimur stólum. En kom þá ekki Sósíalistaflokkurinn, vel til vinstri við salatgaffalinn, og gerir sig líklegan til þess að fá mann. Verður þá mikið afgangs fyrir Vinstri græn? Samkvæmt síðustu könnun fá þeir tvo. en það má ekki mikið breytast til þess að þeir fari niður í einn.

                             ***

Hvað má þá segja um Framsóknarflokkana alla? Vigga víkingur virðist örugg inni, en hún gæti lukkast til að kippa öðrum með. Framsóknarflokkurinn Classic virðist ætla að leka inn með mann, en bara rétt svo. Viðreisn er ekki að fara að vinna neina kosningasigra en gæti skriðið inn með einn mann. Píratarnir virðast vera að auka fylgi sitt og vinna mann, en það er nú samt dræmur sigur, sem mikið til má skrifa á fjölgun borgarfulltrúa.

                             ***

Reykjavíkuríhaldið þykist visst um að geta fengið flest atkvæði, en það mun mikið velta á kjörsókn og annarri skiptingu atkvæða. Líklegast verður það þó Samfylkingin, sem vinnur mesta kosningaafrekið, þegar Ósýnilegi maðurinn nær kjöri í borgarstjórn, bundinn og keflaður í neðsta bílakjallara Ráðhússins. Vel færi á því að Hjálmar Sveinsson héldi þeim sýnileika út næsta kjörtímabil.

Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.