*

sunnudagur, 26. maí 2019
Ásta Sigríður Fjeldsted
11. maí 2019 13:43

Lífskjarasamningur síns tíma í húfi

Svo virðist sem mikilvægasta milliríkjasamningi Íslands sé nú að ósekju teflt í tvísýnu.

EES-samningurinn var samþykktur á Alþingi árið 1993 og tók gildi 1994.
Sverrir Vilhelmsson

Það er erfitt að sitja á sér í ljósi þess hvert umræðan um þriðja orkupakkann er komin – en svo virðist sem umfangsmesta og mikilvægasta milliríkjasamningi Íslands sé að ósekju teflt í tvísýnu.

Yfirlýsingar þeirra sem fara fremstir í flokki í andstöðu við þriðja orkupakkann og halda að þjóðin muni missa vald yfir orkuauðlindum landsins (sem er ekki rétt) og að sæstrengur verði lagður að okkur forspurðum (sem er heldur ekki rétt), vekja upp grunsemdir um, að það sem raunverulega liggur undir, sé andstaða við veru Íslands í EES.

Vert er því að minna á að útflutningur er forsenda blómlegs atvinnulífs og nútíma lífsgæða. Með EESsamningnum hefur Ísland aðgang að um 500 milljóna manna innrimarkaði ESB og EFTA – einu stærsta fríverslunarsvæði heims. Á þeim 25 árum sem liðin eru frá innleiðingu EES hefur útflutningur Íslands vaxið um 269% – um tvöfalt meira en 25 árin þar á undan. Samhliða hefur kaupmáttur launa aukist um 86%. EES-samningurinn er því í vissum skilningi lífskjarasamningur síns tíma og verður það áfram.

Það er gömul saga og ný að helstu vonarstjörnur íslensks viðskiptalífs eru þau fyrirtæki sem byggja útflutning sinn á tækni og hugviti fremur en íslenskum auðlindum. Þau eru ekki landfræðilega bundin og hefðu getað byggst upp annars staðar. Dæmi um slík fyrirtæki eru vel þekkt; Marel, Össur, o.fl. – sem líklega hefðu ekki orðið til í þeirri mynd sem þau eru hefðu þau ekki fengið að keppa á jafnræðisgrundvelli án tolla og annarra viðskiptahindrana innan EES.

Sé markmið okkar að tryggja áframhaldandi hagvöxt og góð lífskjör hér á landi er lykilatriði að slík fyrirtæki fái að vaxa og dafna hér á landi. Forsenda þess er samkeppnishæft, upplýst og opið hagkerfi – og áframhald á veru okkar í EES.

Höfundur er framkvæmdastjóri Viðskiptaráðs Íslands.

Stikkorð: EES orkupakkinn
Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.
25 ára afmælistilboð VB!

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir út árið 2019. Innifalið í tilboðinu er:

  • - Viðskiptablaðið sent heim
  • - Vefaðgangur að vb.is
  • - Frjáls verslun sent heim
  • - Fiskifréttir sent heim