*

miðvikudagur, 19. september 2018
Huginn og muninn
26. ágúst 2018 10:02

RÚV stráir salti í sárin

Magnúsi Geir Þórðarsyni útvarpsstjóra er margt til lista lagt að mati hrafnanna.

Haraldur Guðjónsson

Magnúsi Geir Þórðarsyni útvarpsstjóra er greinilega margt til lista lagt. Undanfarin þrjú rekstrarár hefur hann verið með RÚV réttum megin við núllið og rúmlega það. Á síðasta ári nam afgangurinn ríflega 320 milljónum króna.

Reyndar fær RÚV ríflega fjögurra milljarða forgjöf á aðra fjölmiðla í formi útvarpsgjalds og í ofanálag rekur hann eina skilvirkustu auglýsingadeild í bransanum. Deild sem seldi meðal annars sérstaka auglýsingapakka fyrir HM á tíu milljónir króna. Þá hefur RÚV líka selt byggingarétt á lóðinni sinni fyrir háar fjárhæðir og leigt út hluta af húsi sínu við Efstaleiti.

Svona til að strá salti í sárin þá hefur RÚV nú leigt sínum helsta keppinaut, Stöð 2, stúdíóið í Efstaleiti fyrir beinar útsendingar frá þáttunum Kórar Íslands. Ástæðan er sú að eftir kaup Sýnar (Vodafone) á Stöð 2 á sjónvarpsstöðin ekkert almennilegt stúdíó en það er þó með eitt slíkt í smíðum. Það hlýtur að vera pínu sárt fyrir Stöðvar 2-fólkið að þurfa að mæta upp í Efstaleiti í vinnu, svona svipað og ef KR myndi þurfa að spila heimaleiki sína á Valsvellinum.

Huginn og muninn er skoðanadálkur sem birtist í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð.    

Fréttabréf
Vikulegt fréttabréf Viðskiptablaðsins þar sem greint er frá því helsta sem gerst hefur í íslensku og erlendu viðskiptalífi.