Það styttist óðum í að Volkswagen ID. Buzz komi á markað en bíllinn var frumsýndur í mars síðastliðnum. Talsverð spenna ríkir eftir þessum nýjasta rafbíl Volkswagen fjölskyldunnar.

Um fjölnotabíl er að ræða sem byggir á sama undirvagni og ID.3 og er því afturhjóladrifinn með 201 hestafls rafmótor. Hægt verður að fá bílinn með allt að 77 kW rafhlöðu en ekki hefur enn verið gefið upp hversu mikla drægni bíllinn hefur. Það mun koma í ljós á næstunni en bíllinn verður kynntur bílablaðamönnum í Kaupmannahöfn í lok ágúst. ID. Buzz var fyrst kynntur sem tilraunabíll árið 2017 og hefur verið beðið með eftirvæntingu síðan þá.

ID. Buzz er 4.712 mm langur og hjólhafið rétt tæpir þrír metrar. Bíllinn kemur til að byrja með einungis í fimm sæta útgáfu og með 1.121 lítra farangursrými sem stækka má í 2.205 lítra með því að taka burtu aftari sætaröðina. Volkswagen hefur tilkynnt að á næsta ári komi bíllinn í öflugri fjórhjóladrifs útgáfu og von er á honum einnig í sjö sæta útgáfu í nánustu framtíð.