Á flugvellinum á syðsta útverði íslenska eyjaklasans, Tenerife, er að finna hamborgarastaðinn Burger King. Staðurinn nýtur mikilla vinsælda meðal Íslendinga sem eiga leið um flugstöðina og segja má að hann sé einn helgasti samkomustaður landans að Þingvöllum undanskildum.
Sem kunnugt er þá var Burger King starfrækt í Smáralind hér á landi á fyrsta áratug aldarinnar en af einhverjum óskiljanlegum ástæðum virðist sá rekstur ekki hafa gengið upp. Þar af leiðandi er Tenerife staðurinn sem Íslendingar sækja helst Whopperinn sinn og bræður hans og það sama gildir auðvitað um fleiri lífsins lystisemdir
Eins og flestir sælkerar vita þá hefur Burger King þá sérstöðu fram yfir hamborgarastaði á borð við hina þekktu írsku skyndbitakeðju McDonalds að borgararnir eru eldgrillaðir – að vísu með vélrænum hætti. Þetta gerir borgarana umtalsvert bragðmeiri.
Þá er einnig að finna fjölbreytt úrval af öðrum réttum. Má nefna alveg ljómandi góðar kjúklingasamlokum í því samhengi. En svangir ferðalangar ættu að gefa sér nægan tíma því afgreiðslan á þessum stað getur verið býsna hæg. En á móti kemur ef einhver staða sé hægt að vera „slaggur að njódda“ þá er það á flugvellinum á Tenerife.
Greinin birtist í nýjasta tölublaði Viðskiptablaðsins sem kom út 24. nóvember 2022.
