*

Veiði 24. september 2012

996 hreindýr felld af 1.009 leyfilegum

Margir höfðu ekki tekið skotpróf og þurftu því að skila veiðileyfinu. Flestir nýttu helgar til veiða.

Síðasti dagur veiðitímabilsins var í gær. Heimilt er að fella hreintarfa til 15. september en hreinkýr til 20. september. Veiðkvótinn var 1009 hreindýr.

Ekki náðist að fella 13 hreindýr af útgefnum veiðikvóta í ár, sjö tarfa og sex kýr.

Þetta kemur fram á vef Umhverfisstofnunar en veiðitímabilinu lauk nú fyrir helgi. Veiðikvótinn í ár var 1.009 hreindýr.

Þá kemur fram að mörgum úthlutuðum leyfum var skilað áður en veiðitímabilið hófst og var það aðallega vegna þess að margir höfðu ekki þreytt skotpróf en það er öllum skylt að gera sem er úthlutað leyfi.

„Þetta olli því að mörgum leyfum þurfti að úthluta aftur og ekki tókst að endurúthluta öllum leyfunum þó haft væri samband við fjölmarga umsækjendur á biðlistum,“ segir á vef stofnunarinnar.

„Í heildina gengu veiðarnar vel en þó þurfti að grípa til þess í meira mæli en áður að opna skörun milli samliggjandi veiðisvæða þar sem dreifing dýranna var að nokkru leyti óhefðbundin. Áberandi er hve margir veiðimenn koma til veiða um helgar þannig að þá eru margir veiðihópar á ferðinni á fáum dögum en aðrir dagar eru illa nýttir. Fyrri hluta tímabilsins var veður gott en veðrið var ekki eins hagstætt á seinni hluta veiðitímans og tafði það veiðar eitthvað.“

Á vef Umhverfisstofnunar má jafnframt sjá töflu yfir felld dýr eftir svæðum.

Stikkorð: Hreindýraveiðar  • Hreindýr