*

Matur og vín 30. október 2015

Æfir fyrir virtasta matreiðslumeistaramót heims

„Það er mér mikill heiður að taka þátt í svona mikilvægri keppni,“ segir Viktor Örn Andrésson.

Ásta Andrésdóttir

Viktor Örn Andrésson, Matreiðslumeistari Íslands 2013 og Matreiðslumaður Norðurlanda 2013, hefur nú hafið undirbúning fyrir þátttöku í Bocuse d‘Or, sem er oft kölluð hin eina sanna heimsmeistarakeppni í matreiðslu.  Hann hefur  nú  sagt  starfi  sínu  sem  yfirmatreiðslumaður Lava Restaurant í Bláa lóninu lausu til að  einbeita  sér  að  verkefninu.  

Keppnin Bocuse D‘Or  hefur  verið  haldin  síðan  1987  og  komast færri þjóðir að en vilja. Tuttugu og fjórar þjóðir fá keppnisrétt eftir að hafa unnið forkeppni í sinni heimsálfu,  og  fimm  efstu  sætin  í  sjálfri  keppninni tryggja þeim þjóðum sjálfkrafa keppnisrétt næst.

„Íslendingar hafa tekið þátt í Bocuse D‘Or undanfarin  fimm  skipti,  frá  1999,  með  vægast  sagt  glæsilegum árangri. Við höfum alltaf verið í topp níu af 24 þjóðum á heimsmeistaramótinu og hæst náð þriðja sæti. Tölfræðin sýnir að við erum nú meðal sex bestu þjóða  heims  á  sviði  matreiðslu.  Það  er  mér  mikill heiður að fá að taka þátt í svona stórri og mikilvægri keppni og mjög gaman að fá að keppa við stóru strákana í faginu. Það er eitthvað sem maður býr að alla ævi,“ segir hann fullur tilhlökkunar.

 „Nú  eru sjö mánuðir í keppnina og tíminn verður nýttur vel. Mitt  markmið  er  að  ná  topp  fimm  í  Evrópukeppninni í Búdapest í maí 2016, og síðan að lenda á palli í heimsmeistarakeppninni í Lyon í janúar 2017. Þetta leggst gríðarlega vel í mig.“ 

Viktor Örn Andrésson er í viðtali í Eftir vinnu, fylgiriti Viðskiptablaðsins, sem kom út í gær. Einnig veitir hann uppskriftir að villibráð sem hann hefur sjálfur þróað. Áskrifendur geta nálgast pdf-útgáfu af blaðinu með því að smella á hlekkinn Tölublöð.