Afmælisútgáfa af 7-línu BMW

Þýski lúxusbílframleiðandinn BMW fagnar 100 ára afmæli sínu í ár og ætlar að framleiða sérstaka afmælisútgáfu 7-línunnar í glæsilegri útgáfu í tilefni þess. Þessi afmælisútgáfa BMW M760i verður ekki bara glæsilegur heldur einnig mjög aflmikill bíll. 

Hann verður með 12 strokka 6,6 lítra vél sem skilar 600 hestöflum og 800 Nm í togi. Bíllinn fer úr kyrrstöðu í hundraðið á aðeins 3,9 sekúndum. BMW M760i verður með X-Drive fjórhjóladrifinu. Hann kemur á 21 tommu álfelgum og innrétting bílsins er klædd ljóslituðu leðri sem er handsaumað.

Alcantara efni verður auk þess notað í innréttingunni og mælaborðið einkennist af píanó-svartri áferð. Aðeins verða framleidd 100 eintök af þessum bíl þannig að líklega verður eftirspurnin mikil. Verðmiðinn hefur ekki verið gefinn upp en víst er að hann mun kosta skildinginn.