*

Bílar 22. október 2020

Askja frumsýnir Kia Sorento á Facebook

Vegna kórónuveirufaraldursins verður nýr Kia Sorento frumsýndur á netinu í hádegi á morgun, föstudag.

Nýr Kia Sorento verður frumsýndur á Facebook síðu Kia á Íslandi kl. 12 á morgun, föstudag. Frá og með hádegi á morgun verður jeppinn til sýnis í sýningarsal Kia á Krókhálsi 13 og hjá umboðsmönnum Kia út um land allt þar sem mögulegt verður að fá að reynsluaka honum.

Um er að ræða fjórðu kynslóð þessa stóra og glæsilega bíls sem hefur verið afar vinsæll hér á landi síðan hann kom fyrst á markað árið 2002. Síðan þá hafa alls þrjú þúsund Kia Sorento bílar selst á Íslandi og um þrír milljónir bíla á heimsvísu.

Nýr Kia Sorento er rúmbetri en forverar hans og er sjö manna. Bíllinn kemur nú með þremur mismunandi orkugjöfum; sem tengiltvinnbíll (Plug-in Hybrid), tvinnbíll (Hybrid) og í dísilútfærslu. Tengiltvinnbíllinn er með 13,8 kW rafmótor og 1,6 lítra bensínvél sem skilar 265 hestöflum. Drægi bílsins er 55 km á rafmagninu eingöngu en síðan tekur bensínvélin við.

Tvinnbíllinn er með Hybridtækni þar sem bensínvél og rafmótor vinna saman og skila bílnum 232 hestöflum. Eyðslan er frá 6,8 lítrum á hundraðið í blönduðum akstri. Dísilútfærslan er með 2,2 lítra vél sem skilar 202 hestöflum og eyðslan er frá 6,4 lítrum á hundraðið í blönduðum akstri. Kia Sorento er með nýjum undirvagni og með dráttargetu allt að 2,5 kg. Tengiltvinnbíllinn mun koma í ársbyrjun 2021.

„Við ákváðum að hafa frumsýninguna með óhefðbundnum hætti á þessum sérstöku tímum sem við erum að upplifa vegna Covid-19. Yfirleitt mætir mikill fjöldi fólks á svona frumsýningar, en í ljósi aðstæðna þá viljum við frumsýna bílinn rafrænt og í íslensku umhverfi,“ segir Jón Trausti Ólafsson, framkvæmdastjóri bílaumboðsins Öskju, sem er umboðsaðili Kia á Íslandi.

„Viðskiptavinir geta því fylgst með frumsýningu þessa glæsilega jeppa heima hjá sér í tölvunni eða snjallsímanum á öruggan hátt. Við bjóðum síðan að sjálfsögðu gesti velkomna í sýningarsal Kia á Krókhálsi 13 og til umboðsmanna okkar um allt land þar sem hægt verður að skoða bílinn nánar frá og með hádegi á morgun og fá að reynsluaka honum.“

Framendi, hliðarsvipur og afturendi Sorento hafa fengið alveg nýtt útlit sem gefa bílnum nýtt og fágað yfirbragð. Lóðrétt LED ljós að aftan ljá bílnum kraftalegan og sterkan svip. Auk þess státar hann af nýjustu tækni í ljósabúnaði, tvöföldum LED framljósabúnaði með dagljósavirkni og LED þokuljósum sem auka útsýnið til muna og gera ásýnd bílsins enn glæsilegri.

Í nýjum Kia Sorento eru hátæknivædd DRIVE WiSE akstursstoðkerfi með ýmsum snjöllum lausnum. Þau bregðast skjótt og örugglega við breytingum á akstursskilyrðum og greina varasöm skilyrði sem upp geta komið. Auk þess stuðla þau að aukinni einbeitingu ökumanns og upplýsa hann eftir þörfum.

Innra rými Sorento er vandað og nútímalegt og eykur vellíðan í akstri. Stjórnrýmið er tæknilega fullkomið, mælaborðið notendavænt og 12,3” LCD upplýsingaskjárinn bjartur og skýr og gera mælaborð bílsins framúrstefnulegt.

„Kia Sorento er einn vinsælasti og mikilvægasti bíll Kia og þessi nýja kynslóð kemur til með að halda þeim vinsældum hátt á lofti. Sorento hefur sannað sig vel á Íslandi enda stór og stæðilegur með mikla dráttargetu og mikið pláss fyrir fólk og farangur,“ segir Jón Trausti ennfremur.

„Þessi sjö manna jeppi er mikill ferðabíll og gefur fólki tækifæri á að ferðast um landið á þægilegan og öruggan hátt og sinna frístundunum. Við hlökkum mikið til að kynna hann fyrir landsmönnum á morgun, föstudag, og vonumst til að þessi nýstárlega leið að frumsýna bílinn á Facebook mælist vel fyrir hjá fólki.“

Askja mun streyma Facebook live frá frumsýningu á nýjum Kia Sorento í gegnum Facebook síðu Kia á Íslandi, @kiamotorsisland.