*

Bílar 24. júní 2021

Bílasafn í frystihúsið á Breiðdalsvík

Á meðal safngripa er hin þekkta Mercedes-Benz bifreið Gerlachs ræðismanns Þýskalands á Íslandi í seinni heimstyrjöldinni.

Frystihúsið bílasafn verður opnað í gamla frystihúsinu á Breiðdalsvík næstkomandi laugardag. Í tilkynningu um opnunina kemur fram að safnið opni klukkan 14 og að boðið verði upp á léttar veitingar og leiðsögn um salinn. Safnið mun verða opið alla daga vikunnar í sumar.

Þeir Ingólfur Finnsson, Guðbjartur Guðmundsson, Ingólfur Finnbogason og Ólafur Hvanndal eiga veg og vanda að framtakinu en þeir eru allir vel þekktir bíladellumenn, að því er segir í tilkynningunni. Þá kemur fram að þeir hafi gert Breiðdalsvík að miðpunkti langaksturstúra en svæðið sé annálað fyrir skemmtilegar og hrífandi akstursleiðir. Þeir tveir fyrrnefndu séu heimamenn og enn fleiri heimamenn hafi lagt hönd á plóg, enda sé mikið við að vera á Breiðdalsvík um þessar mundir.

Safnið hefur að geyma rúmlega 20 bifreiðar sem spanna tímabil frá 1936 til 2004 og eru þær annaðhvort perlur úr íslenskri ökutækjasögu eða eiga sér aðrar áhugaverðar sögur sem tengjast íslenskri dægurmenningu og bíladellu. Þar má meðal annarra ökutækja sjá hina þekktu Mercedes-Benz bifreið Gerlachs ræðismanns Þýskalands á Íslandi í seinni heimstyrjöldinni, handsmíðaða íslenska sportbílinn Adrenalin auk annarra fágætra gripa sem sjaldséðir eru á Íslandi.

Húsakynni safnsins eru vegleg og þar má njóta glæsilegs útsýnis við sjávarsíðuna innan um listaverk á fjórum hjólum ásamt forvitnilegra muna úr íslenskri dægurmenningu.

Breiðdalsvík er 139 manna bær á Austurlandi þar sem má finna fjölbreytta afþreyingu, gistingu, tjaldsvæði, brugghúsið og barinn Beljanda og nú einnig Frystihúsið bílasafn.