*

Bílar 6. apríl 2017

Bílasala jókst um 29% á árinu

Fyrstu þrjá mánuði ársins jókst bílasala um 29% frá sama tímabili í fyrra, en 52% aukningarinnar fer til fyrirtækja.

Sala á nýjum bílum frá 1. janúar–31 mars síðastliðinn jókst um 29% en nýskráðir  fólksbílar á þessu tímabili voru 4.657 á móti 3.605 á árinu 2016 eða aukning um 1.052 bíla milli ára. Þetta kemur fram í fréttatilkynningu frá bílgreinasambandinu.

Mesta aukningin er í sölu bíla til fyrirtækja eða tæplega 52% af heildarnýskráningum. Díselbílar eru vinsælastir eða með um 45% af heildarnýskráningum og bensínbílar eru með 39%. hlutdeild. 

Toyota Yaris er mest selda bílategundin á þessum fyrstu þrem mánuðum ársins með 226 bíla og þar fast á eftir í öðru sæti kemur Kia Rio með 184 bíla og í þriðja sæti er Nissan Qashqai með 179 bíla nýskráða.

BL ehf. er með mestu markaðshlutdeildina eða 28% og í öðru sæti kemur Toyota með 18% hlutdeild. Af öllum nýskráðum bílum á árinu eru 1299 þeirra hvítir og er hvítur því vinsælasti liturinn það sem af er árinu.

Stikkorð: fyrirtæki  • Toyota Yaris  • Bílasala