*

Sport & peningar 26. apríl 2018

Blikar skipta í gervigras

Bæjarrráð Kópavogs hefur samþykkt að leggja gervigras á Kópavogsvöll næsta vor.

Lagt verður gervigras á Kópavogsvöll næsta vor en jarðvegsframkvæmdir munu hefjast að loknu keppnistímabili í haust. Þetta var samþykkt einróma í bæjarráði Kópavogs í morgu að því er kemur fram í fréttatilkynningu.

Einnig var samþykkt að byggja upp keppnis- og kastsvæði fyrir frjálsar íþróttir vestan áhorfendastúku Kópavogsvallar. 

Þá samþykkti bæjarráð að ráðast í endurbætur á gervigrasi í Fagralundi í sumar og að völlurinn verði tilbúinn fyrir vetraræfingar, völlurinn verður upphitaður og hugað að bættri aðstöðu þjálfara og skipulagi umferðarmála.

Fyrir lá að endurnýjun Kópavogsvallvar var tímabær en hitalagnir í vellinum eru komnar á tíma. Skoðaðir voru kostir og gallar þess að leggja gras eða gervigras á völlinn og varð niðurstaðan gervisgras sem fyrr segir.  

Með endurnýjun Kópavogsvallar og endurbótum á gervigrasvelli í Fagralundi er aðstaða Breiðabliks til vetraræfinga stórbætt en félagið benti á þörf fyrir betri aðstöðu fyrr í vetur. 

Þetta er fimmta liðið í efstu deild sem hyggst spila á gervigrasi. Stjarnan í Garðabæ hefur lengi spilað á gervigrasi en Valur skipti yfir í gervigras árið 2015. Þá er verið að leggja gervigras í Árbænum fyrir Fylki en í haust stefnir Víkingur Reykjavík að því að skipta út grasinu fyrir gervigras.