*

Veiði 3. desember 2021

Dagbók urriða er komin út

Bókin er óður til stangaveiðinnar og náttúrunnar — útgáfufögnuður verður í bókabúð Sölku í dag.

Ólafur Tómas Guðbjartsson hefur staðið við bakkann með veiðistöng í hönd við hvert tækifæri síðustu 30 ár og nú miðlar hann fróðleik í nafni Dagbókar urriða, meðal annars í sjónvarpsþáttum og hlaðvörpum og nú fyrir jólin kemur út veiðibókin Dagbók urriða. Útgáfufögnuður verður í bókabúð Sölku á Hverfisgötu 89-93 í dag, föstudaginn 3. desember, klukkan 17 til 19.

Bókin er óður Ólafs til veiðinnar og náttúrunnar. Í henni má finna fyndnar og merkilegar sögur, frásagnir af baráttum við ótal fiska á fjölbreyttum slóðum og fróðleik um sjóbirtinga, urriða, bleikjur, laxa og ótal veiðisvæði.

„Ég er veiðisjúklingur. Ég hef lengi verið veiðisjúklingur," segir Ólafur Tómas. „Að einhverju leyti væri hægt að tala um mig sem veiðifíkil. Veiðimennskan átti mig strax frá unga aldri. Ég varð heillaður af því að takast á við náttúruna á einn eða annan hátt. Það er ekki til magnaðri stund en að setja í kraftmikinn fisk og vera algjörlega einn á móti náttúrunni. Að togast á við hana án þess að segja orð. Veiðin hefur alla tíð gefið mér gleði enda er hún alltaf jákvæð.“

Ólafur Tómas leggur mikið upp úr sagnfræði, kennslu, líffræði og öðru sem hann hefur áhuga á og er veiðibók eins og Dagbók urriða tilvalinn vettvangur fyrir slíkt.

„Maður lærir jú mest á því að reka sig á og það hef ég sannarlega gert. Til þess að sjá heildarmyndina þurfum við því fyrst að fara yfir öll mistökin og lærdóminn í kjölfarið. Allt á sér upphaf."

Dagbók urriða fæst í öllum bókaverslunum, matvöruverslunum, veiðibúðum og hjá Sölku, útgefanda bókarinnar.